BAKI, AzerVoice

İsrail yük maşınlarının keçidinə icazə versə də, Qəzzada hələ də humanitar yardım paylanmayıb.

AzerVoice xəbər verir ki, Birləşmiş Millətlər Təşkilatının sözçüsü Stefan Dujarrik Qəzza zolağında vəziyyətin kritik olaraq qaldığını, yardımın bölgəyə çatdırılmasında ciddi maneələrin olduğunu bildirib.

O qeyd edib ki, bir həftəlik blokadadan sonra məhdud humanitar yardım yük maşınlarının keçidinə icazə verilsə də, bu yardım hələ də BMT anbarlarına çatdırılıb paylana bilməyib.

Dujarrik bildirib ki, bazar ertəsi günü uşaq qidası daşıyan dörd yük maşını Qəzzaya daxil olub. Çərşənbə axşamı isə un, dərman və digər əsas ehtiyac malları ilə dolu bir neçə yük maşını bölgəyə girib. Lakin bu yardımlar BMT-nin nəzarətində olan anbarlara çatdırılmayıb və bölgədə təhlükəsizlik şəraiti səbəbindən paylanması mümkün olmayıb.

"Bu gün komandalarımızdan biri Kerem Şalom sərhəd-keçid məntəqəsində saatlarla materialları toplamaq üçün gözləyib, amma yardım anbarlara çatdırıla bilməyib," – deyə Dujarrik bildirib. O əlavə edib ki, yük maşınları boşaldılıb yenidən yükləndikdən sonra onları geri götürmək üçün İsrail ordusundan xüsusi icazə almaq tələb olunur və əsas problem bölgədə təhlükəsizliyin təmin olunmamasıdır.

Qeyd edək ki, İsrail martın 2-dən Qəzza zolağına humanitar embarqo (bir ölkəyə mal gətirilməsinin və ya oradan mal çıxarılmasının qadağan edilməsi) tətbiq etmişdi. Rəsmi Təl-Əviv son günlərdə "aclığın qarşısını almaq üçün əsas miqdarda qidanın keçidinə icazə veriləcəyini" bəyan etsə də, bu qərarın ABŞ və Avropa ölkələrinin göstərdiyi siyasi təzyiqlər nəticəsində verildiyi bildirilir.