BAKI, AzerVoice

Rumıniyada prezident seçkilərinin ikinci turu başlayıb.

AzerVoice-un məlumatına görə, ölkə üzrə təxminən 19 min seçki məntəqəsi açılıb.

Məntəqələr yerli vaxtla saat 07:00-da (Bakı vaxtı ilə 08:00) işə başlayıb və rəsmi olaraq saat 21:00-da bağlanacaq. Lakin bu vaxta qədər növbədə olan seçicilərə saat 23:59-a qədər səsvermə hüququ veriləcək. Səsvermə məntəqələrində təhlükəsizlik və nizam-intizamın qorunmasına 43 mindən çox polis və jandarm nəzarət edir.

Seçkilərdə iştirak üçün təxminən 18 milyon seçici qeydiyyatdan keçib. Xaricdə səsvermə cümə günü başlayıb və üç gün davam edir.

Prezidentlik uğrunda mübarizə aparan namizədlər arasında müxalifətdə olan milliyyətçi “Rumınların Birləşməsi Alyansı”nın lideri Corce Simion və Buxarestin meri, avropamərkəzçi, müstəqil namizəd Nikuşor Dan var.

Qeyd edək ki, bu prezident seçkiləri təkrar keçirilir. Əvvəlki, yəni ötən il noyabrın 24-də keçirilmiş birinci turdan sonra, ən çox səs toplayan milliyyətçi namizəd Kelin Corceskunun kampaniyasının qeyri-qanuni maliyyələşdirilməsi, seçki infrastrukturuna kiberhücumlar və Rusiyanın müdaxiləsi iddiaları səbəbiylə Konstitusiya Məhkəməsi səsverməni dayandırmışdı.

Bu qərar Rumıniyada və beynəlxalq aləmdə qalmaqala səbəb olsa da, hökumət Konstitusiya Məhkəməsinin qərarını qəbul edib və təkrar prezident seçkilərinin 4 və 18 may 2025-ci il tarixlərində keçirilməsini qərara alıb.