BAKI, AzerVoice, Səməd Əyyubov
Şimali Makedoniyada oktyabrın 19-da bələdiyyə seçkiləri keçiriləcək.
AzerVoice xəbər verir ki, bununla bağlı Şimali Makedoniya Parlamentinin sədri Afrim Qaşi qərar imzalayıb.
Qərara əsasən, ilk turda bələdiyyə sədri seçiminin uğursuz nəticələndiyi bələdiyyələrdə ikinci tur noyabrın 2-də keçiriləcək.
Qaşi bildirib ki, seçkilərdən 20 gün əvvəl başlayacaq seçki kampaniyası dövründə parlamentin inzibati fəaliyyəti davam edəcək, lakin plenar iclaslar keçirilməyəcək.
Qeyd edək ki, Şimali Makedoniyada hər dörd ildən bir keçirilən yerli seçkilərdə seçicilər 81 bələdiyyə sədrini və bələdiyyə məclisi üzvlərini müəyyənləşdirirlər. Ölkədə son seçkilər 2021-ci il oktyabrın 17-də baş tutub.