BAKI, AzerVoice
Avropa İttifaqı (Aİ) səfirləri Rusiyaya qarşı 17-ci sanksiya paketini təsdiqləyiblər.
AzerVoice xəbər verir ki, bu haqda Fransa xarici işlər naziri Jan-Noel Barro məlumat verib.
O həmçinin bildirib ki, Avropa və ABŞ Rusiyaya qarşı sanksiyaları daha da sərtləşdirməlidir ki, Rusiya iqtisadiyyatını birdəfəlik boğmaq mümkün olsun.
Mənbələrin məlumatına görə, bu yeni məhdudiyyətlərin Aİ xarici işlər nazirləri tərəfindən mayın 20-də təsdiqlənməsi gözlənilir. Bundan sonra sanksiya paketi Avropa İttifaqının rəsmi jurnalında dərc ediləcək və qüvvəyə minəcək.
Daha əvvəl Avropa KİV-ləri Avropa Komissiyasından sızan sənədlərə əsaslanaraq yeni sanksiya paketinin məzmununu açıqlayıblar. Restriksiyalar çərçivəsində Aİ-nin qara siyahısına Rusiyadan və onun tərəfdaşlarından təxminən 60 fiziki və hüquqi şəxs, həmçinin Rusiya nefti daşıyan 50-dən 150-dək tanker daxil ediləcək. Paketdə dəqiq neçə tankerin sanksiyalara məruz qalacağı hələlik məlum deyil.