BAKI, AzerVoice

Fransa prezidenti Emmanuel Makron ilə İsrailin baş naziri Benyamin Netanyahu arasında Qəzza ilə bağlı sərt mübahisə yaşanıb.

AzerVoice xəbər verir ki, Makron İsrailin Qəzzadakı hərbi əməliyyatlarını tənqid edərək bu addımları "qəbuledilməz və biabırçı" adlandırıb.

Fransa lideri bölgədə yaşanan humanitar vəziyyəti “dəhşətli humanitar dram” kimi qiymətləndirib.

Makron, İsrailin humanitar yardımların qarşısını almasını ciddi bir səhv kimi qiymətləndirərək, vəziyyətin təcili şəkildə dəyişdirilməsinin vacibliyini qeyd edib.

Netanyahu isə Makronun bu çıxışlarına sərt reaksiya verib. O, Fransa prezidentini “terror təşkilatlarının tərəfində yer almaqda” ittiham edərək, beynəlxalq ictimaiyyətin tənqidlərini rədd etdiyini bildirib.

İsrail Baş Nazirlik İdarəsinin verdiyi açıqlamada, Qəzzadakı hərbi əməliyyatların intensivliyinin artırılacağı və müharibənin hələ bitmə nöqtəsində olmadığı qeyd edilib. Netanyahu, İsrail Müdafiə Qüvvələrinin Qəzza sərhədinə tam yerləşdirildiyini və qarşıdakı günlərdə əməliyyatların "tam gücü ilə" davam etdiriləcəyini bildirib.

Bununla yanaşı, Netanyahu bəzi ölkələrlə Qəzzalı mülki vətəndaşların yerləşdirilməsi məsələsində danışıqlar apardıqlarını açıqlayıb.

Qeyd edək ki, ABŞ prezidentinin HƏMAS ilə aparılan girov danışıqlarında İsrailin iştirak etməməsi Təl-Əvivdə narahatlıq yaradıb. HƏMAS lideri Xəlil əl-Həyya, amerikalı-israilli girov Edan Aleksandrın azad edilməsinin ABŞ rəsmiləri ilə birbaşa təmaslar nəticəsində baş verdiyini bildirib. ABŞ-ın Yaxın Şərq üzrə nümayəndəsinin köməkçisi Stiv Vitkoffun Dohada HƏMAS təmsilçiləri ilə görüşdüyü və İsrailin hərbi strategiyasını tənqid etdiyi bildirilir.