BAKI, AzerVoice

Rusiya Prezidenti Vladimir Putinin İstanbulda keçiriləcək sülh danışıqları ilə bağlı son açıqlamaları Kremlin gündəmində qalmaqda davam edir.

AzerVoice xəbər verir ki, Kremlin sözçüsü Dmitri Peskov bildirib ki, Rusiya nümayəndə heyəti sabah Ukrayna nümayəndə heyətini İstanbulda gözləyəcək.

Peskov bu barədə Moskvada jurnalistlərlə keçirdiyi brifinqdə danışıb. O, Türkiyənin ev sahibliyi edəcəyi Rusiya-Ukrayna sülh danışıqları ilə bağlı sualları cavablandırarkən Rusiya tərəfinin danışıqlara hazır olduğunu təsdiqləyib.

“Prezidentdən nümayəndə heyətinin tərkibi ilə bağlı göstəriş aldığımız zaman bu barədə ətraflı məlumat veriləcək. Hələlik belə bir tapşırıq yoxdur. Amma Prezident Putinin mayın 11-də verdiyi açıqlamalar qüvvədə qalır. Rusiya nümayəndə heyəti sabah İstanbulda Ukrayna tərəfini gözləyəcək”, – deyə Peskov bildirib.

Qeyd edək ki, Rusiya ilə Ukrayna arasında davam edən münaqişənin diplomatik yolla həll edilməsi üçün Türkiyə bir neçə dəfə vasitəçi rolunu oynayıb. İstanbulda baş tutacaq bu danışıqlar, tərəflər arasında gərginliyin azaldılması və atəşkəsə doğru irəliləyişin əldə olunması baxımından mühüm əhəmiyyət daşıyır.