BAKI, AzerVoice
ABŞ Prezidenti Tramp Rusiya-Ukrayna danışıqları ilə bağlı açıqlama verib– nümayəndə heyətində iştirak edəcək adlar bəlli olub.
AzerVoice xəbər verir ki, Rusiya və
Ukrayna arasında Türkiyənin vasitəçiliyi ilə İstanbulda keçiriləcək
danışıqlarda ABŞ prezidentinin Yaxın Şərq üzrə nümayəndəsi Steve
Witkoff və Ukrayna üzrə nümayəndəsi Keyt Kelloq iştirak edəcək.
Danışıqlar bu həftənin cümə axşamı baş tutacaq.
ABŞ prezidenti Donald Tramp bu barədə verdiyi açıqlamada, “Həmin anda harada olacağımı bilmirəm. Yaxın Şərqdə bir yerdə olacam, amma faydalı olacağını düşünürəmsə, ora uça bilərəm,” – deyə bildirib.
Hazırda Səudiyyə Ərəbistanı, Birləşmiş Ərəb Əmirlikləri və Qətəri əhatə edən Yaxın Şərq turunda olan Tramp, son həftələrdə Rusiya ilə Ukrayna arasında birbaşa dialoqun bərpası üçün diplomatik təşəbbüsləri dəstəklədiyini vurğulayıb.
Qeyd edək ki, İstanbulda baş tutacaq bu görüş Türkiyənin vasitəçiliyi ilə keçiriləcək və tərəflər arasında uzun müddətdir dayandırılmış sülh danışıqlarına yeni dinamika gətirəcəyi gözlənilir.
