BAKI, AzerVoice
Papa XIV Leo vəzifəyə gəldikdən sonra ilk ibadət mərasimini keçirib.
AzerVoice xəbər verir ki, Katolik
kilsəsinin yeni rəhbəri Papa XIV Leo vəzifəyə seçildikdən sonra ilk
ibadətini Vatikanın məşhur Sikstin kapellasında keçirib.
O, onu seçən kardinallarla birlikdə keçirilən bu dini mərasimdə
qurbangah qarşısında dua edib və iştirakçılara xeyir-dua verib.
Ağ libas geyinmiş XIV Leo mayın 18-də rəsmi olaraq taxta çıxacaq. Dünən 267-ci papa olaraq seçilən XIV Leo həm də ABŞ-dan seçilən ilk papa kimi tarixə düşüb. Çikaqoda doğulan və əsl adı Robert Prevost olan yeni papa, Vatikan protokoluna və ənənələrə daha yaxın mövqe ilə tanınır.
XIV Leo Müqəddəs Pyotr meydanında izdiham qarşısında çıxış edərək selefi Papa Fransiskə təşəkkür edib. “Hamınıza rifah arzulayıram! Aprelin 21-də dünyasını dəyişən Papa Fransiskə xidmətlərinə görə təşəkkür edirəm” - deyə o nitqində bildirib.
Papa seçilməsi zamanı Sikstin kapellasının bacasından qalxan ağ tüstü və bazilikadakı zənglərin səsi ilə elan edilib. Bu hadisə Livan, İspaniya, Aİ və İsrail də daxil olmaqla bir çox ölkədə geniş beynəlxalq reaksiyaya səbəb olub.
ABŞ prezidenti Donald Tramp Papa XIV Leo-nun seçilməsini “ölkəsi üçün böyük şərəf” adlandırıb. Fransa prezidenti Emmanuel Makron yeni papanı “sülh və ümidin daşıyıcısı” olmağa çağırıb. Ukrayna prezidenti Vladimir Zelenski Vatikanın Kiyevə dəstəyinin davam edəcəyinə ümid etdiyini, Rusiya prezidenti Vladimir Putin isə Vatikanla “konstruktiv əməkdaşlıq” mesajı verib.
Yeni papa bazar günü “Regina Coeli” duasında iştirak edəcək və bazar ertəsi jurnalistlərlə görüşəcək.
Qeyd edək ki, Katolik Kilsəsinin yeni rəhbəri Papa XIV Leo, Polşalı II İohann Pavel, alman XVI Benedikt və argentinalı Fransiskdən sonra İtalyan olmayan dördüncü papadır. O, konklavın ikinci günündə minimum 89 səslə seçilib. Katolik kilsəsi qarşısında isə Avropada azalan təsirindən tutmuş, maliyyə problemləri, dini çağırışların azalması və kilsədə uşaq istismarı ilə mübarizə kimi bir sıra ciddi məsələlər dayanır.
