BAKI,AzerVoice, Fərid Mikayılov
Vatikan rəsmi olaraq Papa XIV Leonun ilk xarici səfərinin Türkiyəyə olacağını açıqlayıb.
AzerVoice xəbər verir ki, Vatikan Mətbuat Ofisinin məlumatına görə, Papa 27–30 noyabr 2025 tarixlərində Türkiyəni, daha sonra isə Livana ziyarət edəcək.
Vatikan Mətbuat Ofisi direktoru Matteo Bruni, Papanın hər iki səfəri üçün “müvafiq ölkələrin prezidentlərinin və kilsə rəhbərlərinin dəvətini qəbul etdiyini” bildirib.
Bruni açıqlamasında, Türkiyəyə ediləcək səfərin İznikdə keçirilmiş Birinci İznik Konsilinin 1700-cü ildönümü münasibətilə təşkil ediləcəyini vurğulayıb. Bu çərçivədə Papa XIV Leo, İznikdə tarixi həcc ziyarəti gerçəkləşdirəcək.
Livana planlaşdırılan səfərin marşrutu və proqramının isə yaxın vaxtlarda açıqlanacağı qeyd edilib.
Xatırladaq ki, Papa XIV Leo-nun sələfi Papa Fransisk, 2025-ci ildə Birinci İznik Konsilinin 1700-cü ildönümü münasibətilə İznikə səfər etməyi planlaşdırmışdı. Lakin Papa Fransisk 21 aprel 2025-ci ildə vəfat etdiyindən bu arzusunu yerinə yetirə bilməmişdi.
Yeni Papa Leonun Türkiyə səfəri, həm dini tarix baxımından, həm də Vatikan–Türkiyə münasibətləri üçün simvolik əhəmiyyət daşıyır.