BAKI,AzerVoice, Fərid Mikayılov

Hindistan bu ay ABŞ tərəfindən sanksiyaya məruz qalan və İranla əlaqələndirilən üç neft tankerini saxlayıb.

AzerVoice xəbər verir ki, rəsmi mənbə Hindistanın dəniz zonasında qanunsuz ticarətin qarşısını almaq məqsədilə nəzarəti gücləndirdiyini bildirib.

Məlumata əsasən, saxlanılan gəmilər “Stellar Ruby”, “Asphalt Star” və “Al Jafzia” adlanır. Bildirilir ki, həmin tankerlər hüquq-mühafizə orqanlarından yayınmaq üçün tez-tez ad və qeydiyyat dəyişdiriblər. Onların sahiblərinin isə xaricdə yerləşdiyi qeyd olunur.

Hindistan hakimiyyəti fevralın 6-da “X” platformasında şübhəli fəaliyyət aşkar edildiyini və Mumbaydan təxminən 100 dəniz mili qərbdə üç gəminin saxlanıldığını açıqlamışdı. Sonradan paylaşım silinsə də, mənbə tankerlərin əlavə araşdırma üçün Mumbaya müşayiət olunduğunu təsdiqləyib.

İran dövlət mediası isə Milli İran Neft Şirkətinə istinadla saxlanılan tankerlərin şirkətlə heç bir əlaqəsinin olmadığını bildirib.

Mənbənin sözlərinə görə, Hindistan Sahil Mühafizəsi hazırda dəniz zonasında 24 saatlıq nəzarət üçün 55 gəmi və 10-12 təyyarə cəlb edib.

Qeyd edək ki, ABŞ Maliyyə Nazirliyinin Xarici Aktivlərə Nəzarət İdarəsi ötən il adıçəkilən tankerlərlə eyni IMO nömrələrinə malik gəmilərə qarşı sanksiyalar tətbiq etmişdi. Məlumata görə, iki tanker İranla əlaqələndirilir və 2025-ci ildə İrandan Cibutiyə yanacaq daşıyıb.