BAKI, AzerVoice

Şahzadə Harri ailəsi ilə barışmaq istəyir.

AzerVoice xəbər verir ki, Britaniya kral ailəsinin üzvü, Susseks hersoqu Şahzadə Harri ailəsi ilə münasibətləri bərpa etmək istədiyini bildirib.

“Ailəmlə barışmaq istəyirəm. Mübarizəni davam etdirməyin mənası yoxdur. Həyat çox qiymətlidir.” - deyə ​ o, ailə üzvləri ilə yaşadığı gərginliklərə son vermək arzusunu ifadə edib.

ABŞ-da yaşamağa davam edən şahzadə, xüsusilə atasına – Kral III Çarlza münasibətlərin soyumasından təəssüfləndiyini deyib. “Atamın nə qədər vaxtı qaldığını bilmirəm. Təhlükəsizlik məsələsinə görə mənimlə danışmaq istəmir. Barışmaq yaxşı olardı” - deyə o qeyd edib.

Şahzadə Harri məhkəmənin ona qarşı təhlükəsizlik mühafizəsi səviyyəsini azaltması qərarından sonra verdiyi bu açıqlamada, ailəsinin bəzi üzvləri ilə ciddi fikir ayrılıqları yaşadığını da qeyd edib.

Qeyd edək ki, Şahzadə Harri və həyat yoldaşı Meqan Markl 2020-ci ildə kral ailəsinin rəsmi vəzifələrindən ayrılaraq ABŞ-a köçüblər. Bu qərardan sonra Harri ailəsinə qarşı bir sıra tənqidlər səsləndirib, xüsusilə 2021-ci ildə verdiyi müsahibədə kral ailəsini irqçilikdə və təzyiqlərdə ittiham edib. Bu açıqlamalar ailə ilə münasibətlərin gərginləşməsinə səbəb olub. Təhlükəsizlik təminatları və protokol məsələləri də tərəflər arasında qarşıdurmaların davam etməsinə yol açıb.