BAKI, AzerVoice
ABŞ bu yay genişmiqyaslı elektrik enerjisi kəsintisi ilə üzləşə bilər.
AzerVoice xəbər verir ki, bu barədə ölkənin daxili işlər naziri Duqlas Berqam "Fox News" telekanalına müsahibəsində bildirib.
“ABŞ Prezidenti Donald Tramp ilk gündən etibarən enerji sektorunda fövqəladə vəziyyət elan etdi. ABŞ-da elektrik enerjisinin istehsalı ilə bağlı ciddi problemlər var. Biz İspaniyada baş verənləri gördük. Eyni vəziyyət bu yay Amerikada da yaşana bilər, çünki sabiq prezident Co Baydenin administrasiyası enerji sistemimiz üçün təhlükə yaradıb” - deyə, o bildirib.
Xatırladaq ki, aprelin 28-də İspaniyada ölkə miqyasında elektrik enerjisi ilə bağlı ciddi nasazlıqlar qeydə alınmışdı. Bu hadisə ölkə tarixində ən böyük enerji kəsintilərindən biri hesab olunur. Nəticədə işıqforlar işini dayandırmış, insanlar qatarların içində qalaraq çətin vəziyyətə düşmüş, ictimai nəqliyyat və xəstəxanaların fəaliyyəti pozulmuşdu. Eyni zamanda mobil rabitə və internet xidmətlərində də ciddi problemlər yaşanmışdı. Hadisənin səbəbləri hələ də araşdırılır.
