BAKI, AzerVoice

ABŞ-ın keçmiş milli təhlükəsizlik üzrə müşaviri Mayk Uoltsun İsrailin baş naziri Benyamin Netanyahu ilə İranın hədəfə alınmasını müzakirə etməsi, ABŞ prezidenti Donald Trampın narazılığına səbəb olub.

AzerVoice xəbər verir ki, bu barədə The Washington Post qəzeti məlumat yayıb.

Mənbələrə görə, Uoltsun vəzifəsindən uzaqlaşdırılmasına səbəb olan sonuncu amil onun Signal messencerində yaratdığı qalmaqal olub. Lakin bundan əvvəl o, Trampı Netanyahu ilə fevralın 4-də Ağ Evdə keçirilən görüş ərəfəsində İsrail baş naziri ilə İrana qarşı güc tətbiqi variantlarını fəal şəkildə koordinasiya etməklə qəzəbləndirmişdi. Tramp özü bu məsələdə diplomatik həll yollarına üstünlük verir. Administrasiyanın bəzi üzvləri düşünürdülər ki, Uolts İsraillə sıx əməkdaşlıq quraraq, ABŞ-ı hərbi qarşıdurmaya sövq etməyə çalışırdı.

Qeyd edək ki, Mayk Uolts Trampın milli təhlükəsizlik üzrə köməkçisi vəzifəsində idi. Hazırda bu vəzifəni müvəqqəti olaraq dövlət katibi Marko Rubio icra edir.

Tramp Uoltsun namizədliyini ABŞ-ın BMT-dəki daimi nümayəndəsi vəzifəsinə irəli sürüb. Onun təyinatı ABŞ Konqresinin Senatında Xarici Əlaqələr Komitəsində müzakirəyə çıxarılmalı və daha sonra səsverməyə təqdim olunmalıdır. Hazırda Respublikaçılar Senatda 53 yerə sahibdir.