BAKI, AzerVoice
Tramp administrasiyası Harvard Universitetinin vergidən azad statusunu ləğv etməyi planlaşdırır.
AzerVoice xəbər verir ki, ABŞ
Prezidenti Donald Tramp, Truth Social hesabında verdiyi bəyanatda
Harvard Universitetinin vergidən azad statusunun ləğv ediləcəyini
bildirib.
“Biz Harvardın vergidən azad olmasını aradan qaldıracağıq. Onlar
layiq olduqları budur!” – deyə Tramp paylaşımında qeyd edib.
Bəyanat, universitet kampusunda Fələstinə dəstək nümayişləri və müxtəliflik, bərabərlik və inklüzivlik proqramlarına görə federal hökumətlə Harvard arasında artan gərginliyin fonunda səsləndirilib. Tramp administrasiyası, bu proqramların və siyasi mövqelərin federal qanunlarla uyğunluğunu araşdırmaq məqsədilə Harvard da daxil olmaqla bir sıra universitetlər üçün 8,7 milyard dollardan artıq qrant vəsaitinin istifadəsinə dair təhqiqat başladıldığını açıqlayıb.
Məlumata görə, administrasiya Harvard Universitetinə ayrılmış 2,2 milyard dollarlıq maliyyəni və 60 milyon dollarlıq müqavilə haqqını dondurmaq qərarına gəlib.
Harvard Universiteti isə Tramp administrasiyasının təzyiqlərinə cavab olaraq, bu təhdidlər qarşısında geri çəkilməyəcəyini və islahat tələbini qəbul etməyəcəyini bildirib. Universitetin bəzi professorları federal hökumətin maliyyə araşdırmalarına qarşı hüquqi mübarizə başladıb.
Qeyd edək ki, ABŞ Daxili Gəlir Xidməti tərəfindən universitetlər, fondlar və dini təşkilatlar kimi təxminən 2 milyon qeyri-kommersiya qurumuna vergidən azad status verilib. Bu status yalnız xeyriyyəçilik, təhsil və dini məqsədlərlə ictimai faydaya xidmət edən qurumlara şamil edilir və siyasi fəaliyyətlər bu statusun itirilməsinə səbəb ola bilər.
