BAKI, AzerVoice
Yunanıstanda minlərlə fəhlə və dövlət qulluqçusu 24 saatlıq tətilə çıxaraq hökumətdən maaşların artırılmasını və yaşayış xərclərinə qarşı tədbir görülməsini tələb edib.
AzerVoice xəbər verir ki, GSEE və
ADEDY həmkarlar ittifaqları ilə yanaşı, Kommunist Partiyasına bağlı
PAME ittifaqı da tətilə dəstək verib.
Tətil çərçivəsində ölkə üzrə ictimai nəqliyyat iflic olub — dəmir
yolu və dəniz nəqliyyatı dayandırılıb, hava limanlarında uçuşlar
ləğv edilib.
Paytaxt Afinada keçirilən kütləvi nümayişdə iştirakçılar parlament qarşısında yürüş keçirib, maaş artımı və sosial haqların bərpası tələblərini səsləndiriblər. Aksiya zamanı bəzi iştirakçılar Fələstin bayraqları qaldıraraq İsrailə etirazlarını da ifadə ediblər.
Qeyd edək ki, oxşar etirazlar Saloniki başda olmaqla ölkənin digər şəhərlərində də təşkil olunub.