Bakı. AzerVoice:
Baş nazir Narendra Modinin rəhbərlik etdiyi Hindistan Xalq Partiyasının (“Bharatiya Janata” parti) liderlik etdiyi Milli Demokratik Alyansı (NDA) qalib gəlib
AzerVoice xəbər verir ki, seçicilərin sayının təxminən 970 milyon olduğu ölkədə altı həftə davam edən və yeddi mərhələdən ibarət ümumi seçkilər keçirilmişdir. Federal parlamentin aşağı palatası olan Xalq Məclisinin (Lok Sabha) üzvlərini müəyyən etmək üçün keçirilən seçkilərdə Hindistanın Baş naziri Modinin rəhbərlik etdiyi BJP-nin liderliyi ilə qurulan NDA qalib olmuşdur.
Hindistan mətbuatında yer alan məlumatlara görə, çoxpartiyalı parlament demokratiyası ilə idarə olunan Hindistanda NDA parlamentin Xalq Məclisi qanadındakı 543 yerdən 295-ni qazanıb.
NDA 2019-cu il seçkilərində 353, 2014-cü il seçkilərində isə 336 yer qazanmışdı. Modi builki seçki kampaniyası zamanı NDA-nın 400 yeri keçəcəyini proqnozlaşdırmışdı.
Modinin partiyası BJP 2019-cu il ümumi seçkilərində 303 yer qazansa da, bu seçkilərdə mandatlarının sayı 240-a düşdü. Seçkilərdə gözləniləndən aşağı fərqlə qalib gəlsə də, Modi çıxışında “Bugünkü qələbə dünyanın ən böyük demokratiyasının qələbəsidir” deyib.
Hindistan Milli Konqresi Partiyasının (INC) rəhbərliyi ilə yaradılan və 30-dan çox müxalifət partiyasının daxil olduğu Hindistan Milli İnkişaf Kompleks Alyansı (INDIA) sorğulardakı təxminlərdən xeyli yüksək səs toplayıb.
INDIA alyansı Xalq Məclisi qanadındakı 543 yerdən 231-ni qazanıb.
Müxalifət alyansının lideri və əsas müxalifətdə olan Milli Konqres Partiyası 2019-cu il ümumi seçkilərində 52 mandat qazandığı halda, bu seçkilərdə mandatların sayını demək olar ki, iki dəfə artıraraq 99 mandatın sahibi olub.
Hindistanda bir partiya və ya koalisiyanın hökumət qura bilməsi üçün Xalq Məclisində 543 yerdən 272-yə sahib olması lazımdır.
Əhalisi 1,4 milyarddan çox olan ölkədə təxminən 970 milyon seçici var. Seçkilərdə iştirak nisbəti 2014-cü ildə 66,4 faiz, 2019-cu ildə isə 67,4 faiz olduğu halda, bu seçkidə təxminən 640 milyon insan səs verib.
