Bakı, AzerVoice

İsrailin baş naziri Benyamin Netanyahunun ofisi, Qəzza zolağında saxlanılan girovların azad edilməsi ilə bağlı razılaşmanın əldə edildiyini açıqlayıb.

AzerVoice xəbər verir ki, bu barədə baş nazirin ofisindən verilən açıqlamada bildirilib ki, təsdiq üçün bu gün İsrailin Təhlükəsizlik Kabinetinin iclası planlaşdırılır.

Girovların azad edilməsi ilə bağlı razılaşma danışıqlar qrupu tərəfindən təqdim olunub, ABŞ dövlət katibi Antoni Blinken isə İsrail hökumətinin qərar qəbul etməkdə ləngiməsinə baxmayaraq, atəşkəsin bazar günü qüvvəyə minəcəyini vurğulayıb.

Razılaşmaya əsasən, HƏMAS saxlanılan 33 girovu azad edəcək. Bunun müqabilində İsrail həbsxanalarından yüzlərlə fələstinli məhbusun sərbəst buraxılması nəzərdə tutulur. Razılaşmanın birinci mərhələsinə hərbi əməliyyatların dayandırılması və Qəzza zolağına genişmiqyaslı humanitar yardımın təmin edilməsi də daxildir.

Razılaşma BMT və digər beynəlxalq təşkilatlar tərəfindən müsbət qarşılanıb. Eyni zamanda, İsrailin ifrat sağçı Milli Təhlükəsizlik Naziri İtamar Ben-Qvir, bu razılaşmanı məsuliyyətsiz adlandıraraq, bazar günü təsdiqlənəcəyi təqdirdə hökumətdən istefa verəcəyini açıqlayıb. Lakin o, hökuməti devirmək və ya müxalifətlə əməkdaşlıq etmək niyyətində olmadığını bildirib.

Qeyd edək ki, Qəzza Səhiyyə Nazirliyinin məlumatına görə, İsrailin hərbi əməliyyatları nəticəsində 46,788-dən çox fələstinli həyatını itirib. BMT-nin məlumatına əsasən, Qəzzada binaların 69%-i zədələnib və ya dağıdılıb. ÜST isə səhiyyə sisteminin yenidən qurulması üçün ən azı 10 milyard dollar vəsaitin lazım olduğunu bəyan edib.

Avropa İttifaqı Qəzzanın yenidən qurulması və humanitar yardım üçün 120 milyon avro vəsait ayıracağını açıqlayıb. Misir isə Qəzzanın yenidən qurulması üçün beynəlxalq konfransa ev sahibliyi etməyə hazır olduğunu bildirib.