BAKI, AzerVoice

İranın xarici işlər naziri Seyid Abbas Araqçi bildirib ki, İsrailin hücumları davam etdiyi müddətcə İran heç bir tərəflə danışıqlar aparmayacaq.

AzerVoice xəbər verir ki, bu barədə İran KİV məlumat yayıb.

Araqçi qeyd edib ki, İran özünümüdafiə hüququndan istifadə etməyə davam edəcək və bu çərçivədə atılacaq addımlardan geri çəkilməyəcək.

Bununla belə, o vurğulayıb ki, İran Avropanın üç ölkəsi – Fransa, Almaniya və Böyük Britaniya ilə (“Avropa üçlüyü”) məsləhətləşmələri davam etdirməyə və yaxın gələcəkdə yeni bir görüş keçirməyə hazırdır.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.

Bu hücumlara cavab olaraq isə İran Ordusu İsrailə qarşı "Həqiqi vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.