BAKI,AzerVoice, Nailə Babazadə

Qəzza zolağının cənubundakı Xan Yunis şəhərində yerləşən Nəcat Qaçqınlar Düşərgəsinin sakinləri həyat üçün zəruri olan ən əsas ehtiyacların belə çətin tapıldığı bir şəraitdə bərəkət, xeyirxahlıq və həmrəylik ayına – Ramazana hazırlaşır və daha gözəl Ramazan günlərinin xəyalını qururlar.

AzerVoice xəbər verir ki, İsrailin blokadası və hücumları altında yaşayan qəzzalılar artıq 3 ildir ki, çadır şəraitinin ağır şərtləri ilə mübarizə aparır. Sabit və ləyaqətli həyat imkanından məhrum edilən fələstinlilər siyasi və hərbi qeyri-müəyyənliyin davam etdiyi, sığınacaq və qida kimi ən elementar ehtiyacların belə tam ödənilmədiyi bir mühitdə həyata tutunmağa çalışırlar.

Ramazanı adətən böyük coşqu ilə, sanki bayram kimi qarşılayan qəzzəlilər bu il də çadırlarda belə Ramazan hilalının sönməyəcəyini və onun fələstinlilər üçün ümid rəmzi olduğunu göstərməyə çalışırlar.

Bu məqsədlə Nəcat düşərgəsinin sakinləri də hazırlıqlara başlayıblar. Düşərgədə çadırlara “xeyirli Ramazanlar” yazıları asılıb, Ramazan fənərlərinin təsvirləri çəkilib, ərazi başdan-başa Fələstin bayraqları ilə bəzədilib. Axşam saatlarında işıqlandırma üçün bayraqların arasına lampalar yerləşdirilib, led işıqlarla dekorasiya edilib.

Düşərgə məscidinin üzərində böyük bir fənər asılıb, meydançaya isə uşaqlar üçün yelləncəklər və trambolin qurulub. Uşaqlar Ramazan boyu davam edəcək bu əyləncələrə artıq indidən başlayıblar.

Düşərgə sakinləri, gəncindən yaşlısına qədər, hücumların dayandığı, itkilərin olmadığı sakit bir Ramazan arzuladıqlarını bildirirlər.

Düşərgə sakinlərindən olan uşaq Məhəmməd Abdulfəttah Fucu bildirib ki, “Bu çətin şəraitdə, blokada və yaşadığımız ağrılara baxmayaraq, özümüzü sevindirməyə çalışdıq və buna görə düşərgəni bəzədik.”

O qeyd edib ki, Ramazanın özünəməxsus ənənələri var və bəzəklər də bunlardan biridir. Fucu iftar və imsak vaxtlarında bir araya gəldiklərini, bunun Qəzzədə müqəddəs sayılan dəyərlərdən olduğunu deyib.

O, İslam dünyasına müraciət edərək Ramazan ayında bombardmanların dayandırılmasını istəyib və bildirib ki, heç bir ailə süfrə arxasında yaxınlarından birini itirmək istəmir.

Digər uşaq Dima Zuğrub isə karton qutulardan fənərlər hazırladıqlarını deyərək, Ramazanı böyük ümid və evlərinə qayıtmaq arzusu ilə qarşıladıqlarını vurğulayıb. O, köç etdikləri Rəfahı çox darıxdıqlarını və tezliklə evlərinə qayıtmaq istədiklərini bildirib.

Düşərgə sakini Əbu Mahmud Aşur da bu il Ramazanın yenə ağır şərtlər altında qarşılandığını qeyd edərək, Rəfahdan Xan Yunisə köç etdiklərini və bu Ramazanın əvvəlkilərdən daha yaxşı keçəcəyinə ümid etdiklərini söyləyib.