BAKI,AzerVoice, Nailə Babazadə

ABŞ Cənubi Çin dənizində mümkün təhdidlərin qarşısını almaq məqsədilə Filippinlərə daha çox müasir raket sistemləri yerləşdirməyi nəzərdən keçirir. Vaşinqton və Manila Çin tərəfindən həyata keçirildiyini bildirdikləri “qanunsuz, məcburedici və aqressiv fəaliyyətləri” kəskin şəkildə pisləyiblər.

AzerVoice xəbər verir ki, ABŞ və Filippin rəsmiləri Manilada keçirilən illik danışıqlarda təhlükəsizlik, siyasi və iqtisadi əməkdaşlığın genişləndirilməsini müzakirə ediblər. Tərəflər bu il üçün birgə hərbi təlimlərin artırılması, Filippin ordusunun modernləşdirilməsi və ölkəyə əlavə yüksək texnologiyalı raket və pilotsuz sistemlərin yerləşdirilməsi barədə razılığa gəliblər.

Birgə bəyanatda naviqasiya azadlığının, hava məkanından sərbəst istifadə hüququnun və beynəlxalq dəniz ticarətinin qorunmasının vacibliyi vurğulanıb. Həmçinin Çinin Cənubi Çin dənizindəki addımlarının regional sabitliyə və Hind-Sakit okean iqtisadiyyatına mənfi təsir göstərdiyi qeyd olunub.

Çin isə Filippinin şimalında ABŞ-a məxsus “Typhon” orta mənzilli raket sisteminin və gəmi əleyhinə raket qurğularının yerləşdirilməsinə etiraz edir. Pekin bu addımları özünün yüksəlişinə qarşı yönəlmiş siyasət kimi qiymətləndirir və onların regional sabitliyə təhdid olduğunu bildirir.

Filippin tərəfi isə raket sistemlərinin sırf çəkindirici məqsəd daşıdığını bəyan edib. ABŞ-ın yerləşdirdiyi “Typhon” qurğuları “Standard Missile-6” və “Tomahawk” tipli raketləri buraxa bilir. “Tomahawk” raketlərinin 1600 kilometrdən artıq mənzili var ki, bu da Luzon bölgəsindən Çinin bəzi ərazilərini hədəf radiusuna daxil edir.

Son illərdə Çin və Filippin sahil mühafizə qüvvələri arasında mübahisəli sularda qarşıdurmalar artıb. Ərazi iddialarında Vyetnam, Malayziya, Bruney və Tayvan da iştirak edir. ABŞ və Filippin rəsmiləri bildirirlər ki, planlaşdırılan yeni sistemlər regionda balansı qorumaq və mümkün aqressiyanı önləmək məqsədi daşıyır.