BAKI,AzerVoice, Fərid Mikayılov
Səudiyyə Ərəbistanı çərşənbə axşamı milli təhlükəsizliyinin “qırmızı xətt” olduğunu bəyan edib və Yəmənin cənubundakı Mukalla limanına endirilən hava zərbəsindən bir neçə saat sonra Birləşmiş Ərəb Əmirlikləri qüvvələrindən Yəməni tərk etməyi tələb edib.
AzerVoice xəbər verir ki, Riyad BƏƏ-yə bunun üçün 24 saat vaxt verib.
Bu, Səudiyyə Ərəbistanının Abu-Dabiyə qarşı indiyədək səsləndirdiyi ən sərt mövqe kimi qiymətləndirilir.
Körfəz regionunun iki əsas neft istehsalçısı arasında gərginliyin pik həddə çatdığı bir vaxtda Səudiyyə Ərəbistanının rəhbərlik etdiyi koalisiya bəyan edib ki, zərbə BƏƏ-nin dəstəklədiyi cənublu separatçılara göstərilən xarici hərbi dəstəyə qarşı yönəlib. Eyni zamanda, Yəməndə Səudiyyə Ərəbistanının dəstəklədiyi Prezident Şurasının sədri Rəşad əl-Əlimi BƏƏ qüvvələrinin çıxarılması üçün son müddəti elan edib.
Rəşad əl-Əlimi BƏƏ ilə imzalanmış müdafiə sazişini də ləğv edib və televiziya ilə yayımlanan çıxışında Əmirlikləri Yəməndə daxili qarşıdurmanı qızışdırmaqda ittiham edib.
“Təəssüf ki, Birləşmiş Ərəb Əmirliklərinin Cənub Keçid Şurası üzərinə təzyiq göstərdiyi, onu dövlət hakimiyyətini zəiflətməyə və hərbi eskalasiya yolu ilə üsyana sövq etdiyi qəti şəkildə təsdiqlənib” – deyə əl-Əlimi bildirib.
Səudiyyə Ərəbistanı Əmirlikləri bu tələblərə əməl etməyə çağırıb. BƏƏ Xarici İşlər Nazirliyi məsələ ilə bağlı dərhal mövqe açıqlamayıb.
Bu ay Cənub Keçid Şurası ilə Səudiyyə Ərəbistanının dəstəklədiyi Yəmən hökumət qüvvələri arasında baş verən hücumlar, 2014-cü ildən bəri vətəndaş müharibəsi ilə üzləşən Yəməndə müttəfiqləri açıq silahlı qarşıdurmaya yaxınlaşdırıb.
Birləşmiş Ərəb Əmirlikləri əvvəllər İrana yaxın husilərə qarşı mübarizə aparan Səudiyyə Ərəbistanının rəhbərlik etdiyi koalisiyanın üzvü olub. 2019-cu ildən etibarən ölkədəki hərbi mövcudluğunu azaltmağa başlasa da, Səudiyyənin dəstəklədiyi beynəlxalq səviyyədə tanınmış hökumətə sadiqliyini saxlayıb.
Koalisiyanın açıqlamasına görə, hava zərbəsi həftəsonu BƏƏ-nin Fuceyra limanından icazəsiz şəkildə Mukallaya daxil olan iki gəmidən sonra həyata keçirilib. Bildirilir ki, gəmilər limana çatdıqdan sonra izləmə sistemlərini söndürüb və Cənub Keçid Şurasını dəstəkləmək məqsədilə böyük həcmdə silah və döyüş texnikası boşaldıblar.
Səudiyyə Ərəbistanı daha əvvəl əsas cənublu separatçı qrupu ölkənin şərqində yerləşən Hadramut vilayətində hərbi addımlardan çəkinməyə çağırmış və cənubun geniş hissəsinə nəzarəti ələ keçirdikdən sonra qüvvələrinin geri çəkilməsini tələb etmişdi.
Səudiyyə dövlət mediasının məlumatına görə, Mukalla limanına endirilən zərbə nəticəsində ölən və ya yaralanan olmayıb, mülki infrastruktura ziyan dəyməyib. Mənbələr hücumun silahların boşaldıldığı körpünü hədəf aldığını bildirib.
BƏƏ-nin dəstəklədiyi qüvvələr Yəmənin cənubunda, o cümlədən strateji əhəmiyyətə malik Hadramut vilayətində geniş ərazilərə nəzarət edir. Rəşad əl-Əlimi təhlükəsizlik məqsədilə 72 saat müddətinə bütün liman və keçidlərdə hava, dəniz və quru hərəkətinə məhdudiyyətlər tətbiq edib. Yalnız koalisiya tərəfindən icazə verilən hallar istisna təşkil edəcək.
Cənub Keçid Şurası əvvəlcə 2015-ci ildə husilərə qarşı Yəmənə müdaxilə edən koalisiyanın tərkibində yer alsa da, sonradan cənub bölgəsində özünüidarə tələbi ilə çıxış edib. 2022-ci ildən etibarən isə Səudiyyə Ərəbistanının dəstəklədiyi hakimiyyət bölgüsü təşəbbüsü çərçivəsində husilərin nəzarətindən kənar cənub ərazilərini idarə edən siyasi-hərbi ittifaqın bir hissəsinə çevrilib.
Husilər isə paytaxt Səna da daxil olmaqla Yəmənin şimal bölgələrinə nəzarət edir və Səudiyyənin dəstəklədiyi hökuməti ölkənin cənubuna çəkilməyə məcbur ediblər.
Koalisiya bəyan edib ki, legitim hökumətlə razılaşdırılmadan Yəməndə hər hansı tərəfə xarici hərbi dəstək göstərilməsinə yol verilməyəcək.