BAKI, AzerVoice, Nailə Babazadə
Qəzza Mülki Müdafiə İdarəsinin sözçüsü Mahmud Basal soyuq hava şəraiti və fırtınanın başlamasından bəri Qəzza zolağında 17 fələstinlinin soyuqdan həyatını itirdiyini açıqlayıb.
AzerVoice xəbər verir ki, Qəzza Mülki Müdafiə İdarəsinin “Telegram” hesabında yayımlanan açıqlamada Basal bildirib ki, güclü yağış və fırtına nəticəsində indiyədək 17-dən çox bina tamamilə uçub. Eyni müddət ərzində 90-dan çox binada qismən çökmə qeydə alınıb. Onun sözlərinə görə, bu vəziyyət minlərlə insanın həyatını birbaşa təhlükə altına salır.
Mahmud Basal qeyd edib ki, güclü yağışlar və sel səbəbindən Qəzzada yerindən didərgin düşmüş fələstinlilərin sığındığı müvəqqəti barınacaqların təxminən 90 faizi su altında qalıb. Bir çox bölgədə çadırların sular altında qalaraq yararsız hala düşdüyünü bildirən sözçü minlərlə ailənin geyimlərinin, yataq dəstlərinin və yorğanlarının zərər gördüyünü vurğulayıb.
Basal əlavə edib ki, fırtınaların təsirli olmağa başladığı vaxtdan bəri mülki müdafiə qurumuna 5 mindən çox yardım çağırışı daxil olub. O bildirib ki, soyuq hava şəraiti nəticəsində həyatını itirən 17 fələstinlidən 4-ü uşaqdır, bəzi ölümlər isə binaların çökməsi ilə bağlıdır.
Qəzza Mülki Müdafiə İdarəsinin sözçüsü beynəlxalq ictimaiyyətə və dünya ölkələrinə çağırış edərək, fələstinlilərə təcili humanitar yardımın göstərilməsi üçün dərhal hərəkətə keçilməsini istəyib. O, mövcud çadırların yaşayış üçün yararsız olduğunu bildirərək, insan ləyaqətini və həyat təhlükəsizliyini təmin edən təhlükəsiz yaşayış evlərinin təmin olunmasını və yenidənqurma prosesinin dərhal başlanmasını tələb edib.
Açıqlamada qeyd olunur ki, atəşkəsə baxmayaraq İsrail Qəzza zolağına çadır və digər barınma materiallarının girişinə icazə vermir. Bu səbəbdən yüz minlərlə insan köhnə və yararsız müvəqqəti çadırlarda yaşamağa məcbur qalır.
Qəzza rəsmiləri bölgəyə təcili konteyner evlərin və ağır texnikanın göndərilməsini tələb edirlər.
Xatırladaq ki, İsrailin 8 oktyabr 2023-cü ildən başlayaraq iki il davam edən hücumları nəticəsində 70 mindən çox fələstinli həlak olub, 171 mindən çox insan yaralanıb. Qəzza zolağında mülki infrastrukturun təxminən 90 faizi dağıdılıb, ərazidə 70 milyon tona yaxın dağıntı qalığı yığılıb və minlərlə cənazənin hələ də dağıntılar altında olduğu bildirilir.