BAKI, AzerVoice, Orxan Qədirzadə

Livan Prezidenti Cozef Aun ölkəsinin Suriya ilə quru və dəniz sərhədlərinin müəyyənləşdirilməsinə hazır olduğunu bəyan edib.

AzerVoice xəbər verir ki, Prezident administrasiyasının yaydığı məlumata görə, Aun bu açıqlamanı Beyrutun şərqində yerləşən Baabda Prezident Sarayında “Azadlıq uğrunda Jurnalistlər Assosiasiyası”nın nümayəndə heyətini qəbul edərkən səsləndirib.

Görüş zamanı Livan–Suriya münasibətlərinə toxunan Prezident Aun əlaqələrin “yavaş, lakin müsbət istiqamətdə inkişaf etdiyini” bildirib. O, Livan həbsxanalarında saxlanılan suriyalı məhbuslarla bağlı məsələnin həlli üçün iki ölkə arasında imzalanmış məhkəmə-hüquq əməkdaşlığı sazişinin aktivləşdirilməsini tələb etdiklərini qeyd edib.

Aun bildirib ki, Fransa Livana Suriya sərhədlərinə dair xəritələr təqdim edib və “Şam tərəfi qərar verərsə, quru və dəniz sərhədlərinin müəyyənləşdirilməsinə hazırıq. Livan komissiyası artıq formalaşdırılıb və fəaliyyətə hazırdır.”

Qeyd edək ki, Livan və Suriya arasında sərhədlərin dəqiq müəyyənləşdirilməsi məsələsi Fransa mandatı dövründən (1920–1946) sonra hər iki ölkənin müstəqillik qazanmasından bəri xroniki problem olaraq qalır.

Dağlıq, vadili və düzənlik ərazilərdən keçən Livan-Suriya sərhəd xətti boyunca aydın fiziki sərhəd nişanələri mövcud deyil. Təxminən 375 kilometr uzunluğunda olan bu sərhəd boyunca iki ölkəni birləşdirən 6 quru sərhəd-keçid məntəqəsi fəaliyyət göstərir.