BAKI, AzerVoice, Orxan Qədirzadə

ABŞ-də yetkinlik yaşına çatmayanlara qarşı cinsi istismar şəbəkəsi yaratmaqda ittiham olunan və həbsxanada ölü tapılan milyarder Ceffri Epşteynin albomundan ABŞ Prezidenti Donald Trampın da yer aldığı 19 yeni fotoşəkil ictimaiyyətə açıqlanıb.

AzerVoice xəbər verir ki, fotoşəkillər ABŞ Konqresinin Nəzarət və Hesabatlılıq Komitəsinin demokrat üzvləri tərəfindən paylaşılıb. Kadrlarda Trampdan başqa onun sabiq müşaviri Stiv Bennon, keçmiş ABŞ Prezidenti Bill Klinton, milyarder iş adamı Bill Geyts və digər yüksək profilli şəxslərin də yer aldığı bildirilib.

Məlumata görə, fotoşəkillər Epşteynin malikanəsində çəkilib və ona məxsus elektron poçt ünvanından əldə edilib. ABŞ mediası yayımlanan 19 yeni kadrın Epşteynin həmin şəxslərlə keçmiş əlaqələrini və “xüsusi münasibətlər” qurduğunu göstərdiyini yazır.

Komitənin yaydığı materiallar arasında üzərində Prezident Trampın üz təsviri olan və 4,5 dollar qiymət etiketi göstərilən prezervativlər də yer alıb. Bu görüntülər ABŞ mediasında və sosial şəbəkələrdə geniş rezonans doğurub.

Digər bir fotoşəkildə isə Trampın, üzləri komitə tərəfindən gizlədilmiş altı qadınla birlikdə görüntüləndiyi qeyd olunur. Kadrlarda şəkillərin dəqiq olaraq nə vaxt, harada və kim tərəfindən çəkildiyi hələlik açıqlanmayıb.

Paylaşılan materiallarda həmçinin Bill Klintonun Epşteyn və onun yaxın silahdaşı Gisleyn Maksuell ilə birlikdə görüntüləri, eləcə də Şahzadə Endryu, Bill Geyts və Harvard Universitetinin sabiq rektoru Lerri Samers kimi şəxslərin Epşteynin malikanəsində olduğu anlar yer alır.

ABŞ Nümayəndələr Palatasının Nəzarət Komitəsinin üzvü Robert Qarsia bildirib ki, Epşteynə məxsus mülklərdən əldə edilən son sənədlər 95 mindən çox fotoşəkli əhatə edir və bu materiallarda Epşteynlə əlaqədə olmuş “zəngin və nüfuzlu kişilərin, eləcə də minlərlə qadının görüntüləri” mövcuddur.