BAKI, AzerVoice, Nailə Babazadə

ABŞ Prezidenti Donald Tramp, Qəzzadakı atəşkəs prosesinin davam etdiyini bildirərək “ikinci mərhələnin çox yaxın zamanda həyata keçiriləcəyini” deyib.

AzerVoice xəbər verir ki, ABŞ Prezidenti Tramp, Ağ Evdə keçirdiyi mətbuat konfransından sonra jurnalistlərin gündəmə dair suallarını cavablandırıb.

Tramp, Qəzzada ikinci mərhələyə nə vaxt keçiləcəyi ilə bağlı sualı cavablandırarkən prosesin irəlilədiyini vurğulayıb və “İkinci mərhələ çox tezliklə baş tutacaq” deyə qeyd edib.

ABŞ Prezidenti həmçinin Qəzzada və Yaxın Şərqdə sülhün olduğunu və bu prosesi 59 ölkənin dəstəklədiyini bildirib, bunun əhəmiyyətli beynəlxalq dəstək olduğunu qeyd edib.

Digər tərəfdən, Tramp bölgədə partlayan bir bombanın “yaralanmalara və bəzi insanların ölümünə” səbəb olduğunu deyib, lakin bununla nəyi nəzərdə tutduğunu dəqiqləşdirməyib.

Qeyd edək ki, İsrail, ABŞ-ın dəstəyi ilə 8 oktyabr 2023-cü ildə Qəzzədə genişmiqyaslı hücuma başlamışdı. Bu hücumlarda 70 mindən çox fələstinli həyatını itirib, əksəriyyəti qadın və uşaqlardan ibarət təxminən 171 min nəfər yaralanıb.

10 oktyabrda qüvvəyə minmiş atəşkəs razılaşmasının döyüşləri dayandıracağı gözlənilsə də, İsrail razılaşmanı hər gün pozur. Hücumlar nəticəsində yüzlərlə fələstinli öldürülüb və yaralanıb.

İsrail, həmçinin təxminən 2,4 milyon fələstinlinin fəlakət şəraitində yaşadığı Qəzzəyə kifayət qədər ərzaq və dərman daxil olmasını əngəlləməkdə davam edir.