BAKI, AzerVoice, Nailə Babazadə

İsrail ordusu Livanın cənubundakı Nəbətiyyə vilayətində bir avtomobili pilotsuz uçuş aparatı (PUA) ilə hədəfə alıb.

AzerVoice xəbər verir ki, Livanın rəsmi NNA agentliyinin məlumatına görə, Nəbətiyyəyə tabe olan Bint Cubeyl rayonunda bir avtomobil İsrailə məxsus PUA tərəfindən vurulub.

Hücum nəticəsində yaralıların olduğu və təcili tibbi yardım qruplarının hadisə yerinə cəlb edildiyi bildirilib.

Livan rəsmiləri hadisə ilə bağlı hələlik açıqlama verməyiblər.

İsrail və Livan arasında 27 noyabr 2024-cü ildə əldə olunan atəşkəs razılaşmasına baxmayaraq, İsrail bu razılaşmanı tez-tez pozur.

Xatırladaq ki, İsrail 2023-cü ilin oktyabrında Livana qarşı hücuma başlamış, 2024-cü ilin sentyabrında bu hücum genişmiqyaslı müharibəyə çevrilmişdi. Müharibə zamanı 4 mindən çox insan həlak olmuş, təxminən 17 min nəfər yaralanmışdı.

2024-cü ilin noyabrında Livan və İsrail arasında əldə olunan atəşkəs razılaşmasına baxmayaraq, İsrailin bu müddətdə atəşkəsi 4 min 500-dən çox dəfə pozduğu, nəticədə yüzlərlə dinc sakinin öldüyü və yaralandığı bildirilmişdi.

İsrail hələ də Livanda ələ keçirdiyi 5 təpəni işğal altında saxlayır və onilliklərdir nəzarətində olan bəzi ərazilərdə varlığını davam etdirir.