BAKI, AzerVoice

ABŞ Prezidenti Donald Tramp bazar günü bildirib ki, İsrail ilə “HƏMAS” hərəkatı arasında elan olunan atəşkəs hələ də qüvvədədir. O, bu bəyanatı İsrailin “HƏMAS” mövqelərinə qarşı onlarla hava hücumu həyata keçirməsindən sonra verib. Tramp prezident təyyarəsində jurnalistlərə açıqlamasında “Atəşkəs qüvvədədir” deyərək, “HƏMAS” rəhbərliyinin bu pozuntulara birbaşa aidiyyəti olmadığını vurğulayıb və məsuliyyəti “hərəkat daxilindəki bəzi üsyançı qrupların” üzərinə atıb.

“Hər halda, məsələ lazımi qaydada həll olunacaq. Qətiyyətlə, amma qaydasında.”-deyə o əlavə edib.

İsrail ordusu isə bu gün səhər saatlarında “HƏMAS”ın atəşkəsi pozduğunu əsas gətirərək Qəzzada əməliyyatları bərpa etdiyini açıqlamışdı.

Ordu məlumatında “HƏMAS” silahlılarının Qəzzanın cənubundakı Rəfah bölgəsində mühəndislik texnikalarına hücum etdikləri bildirilib. Cavab olaraq İsrail hava zərbələri və artilleriya atəşi həyata keçirib. “HƏMAS”ın hərbi qanadı olan “İzzəddin əl-Qəssam briqadaları” isə Rəfahda baş verən hadisələrdən xəbərsiz olduqlarını bəyan edib.

İsrailin müdafiə naziri İsrael Kats da gün ərzində açıqlama verərək, ordunun “HƏMAS” hədəflərinə qarşı “qətiyyətli şəkildə hərəkət etməsi” barədə göstəriş aldığını bildirib və hərəkatı “atəşkəsi pozduğu hər bir hadisə üçün ağır bədəl ödəyəcəyi” ilə hədələyib.