BAKI, AzerVoice, Nailə Babazadə

İsrail hökumətinin sözçüsü Şuş Bədrisyan cümə axşamı bildirib ki, Qəzza zolağında əldə olunan atəşkəs və girov-məhbus mübadiləsi razılaşması Fəth hərəkatının tanınmış lideri Mərvan Bərqutini əhatə etməyəcək.

AzerVoice xəbər verir ki, bu haqda Bədrisyan mətbuat konfransında Bərqutinin taleyi ilə bağlı suala cavab verən deyib.

“Bu mərhələdə o, mübadiləyə daxil olmayacaq.”-deyə o qeyd edib.

Daha əvvəl danışıqlara yaxın mənbələr bildirmişdilər ki, HƏMAS ABŞ Prezidenti Donald Trampın planının birinci mərhələsi çərçivəsində azad ediləcək məhbusların siyahısına Mərvan Bərqutinin də daxil edilməsini tələb edib.

İsrail və HƏMAS arasında aparılan dolayı danışıqlarda razılaşdırılıb ki, Qəzzada saxlanılan 48 israilli girovun azadlığı müqabilində İsrail təxminən 2000 fələstinli məhbusu azad edəcək.

“Nazirlər Kabinetinin iclasından 24 saat sonra (GMT 14:00-dan etibarən) Qəzzada atəşkəs qüvvəyə minəcək. Sazişin birinci mərhələsinin yekun mətni bu səhər Misirdə bütün tərəflər tərəfindən imzalanıb.”-deyə Bədrisyan əlavə edib.

ABŞ-ın “CNN” telekanalı İsrail rəsmilərinə istinadla xəbər verib ki, Qəzza razılaşması çərçivəsində HƏMAS liderləri Yəhya və Məhəmməd Sinvarın cəsədləri İsrail tərəfindən təhvil verilməyəcək.

Məlumata görə, hələlik azad ediləcək fələstinli məhbusların yekun siyahısı razılaşdırılmayıb. İsrail mənbəsi “CNN”ə bildirib ki, HƏMAS bəzi məhbusların azad edilməsini tələb edir, lakin İsrail qətl törətməkdə ittiham olunan məhbusların sərbəst buraxılmasına qarşı çıxır. Onların İordan çayının qərb sahəsinə qaytarılmayacağı və üçüncü ölkəyə köçürülüb-köçürülməyəcəklərinin hələ müəyyən edilmədiyi qeyd olunub.