BAKI,AzerVoice
İsrail hökuməti cümə günü səhər saatlarında Fələstin HƏMAS hərəkatı ilə Qəzzada atəşkəs razılaşmasını təsdiqləyib. Bu qərar, 24 saat ərzində döyüş əməliyyatlarının dayandırılması və 72 saat ərzində israilli girovların azad edilməsi üçün yol açır.
Hökumətin qərarı vasitəçilərin atəşkəs və qarşılıqlı azadlığa dair razılaşmanı elan etməsindən təxminən 24 saat sonra qəbul olunub. Saziş ABŞ Prezidenti Donald Trampın Qəzza müharibəsini başa çatdırmaq məqsədilə irəli sürdüyü planın birinci mərhələsini təşkil edir. İsrailin Baş naziri Benyamin Netanyahunun “X” sosial şəbəkəsindəki hesabında yazılıb:
“Hökumət azad və həlak olmuş bütün girovların azad edilməsini nəzərdə tutan çərçivəni təsdiqlədi.”
ABŞ-dan 200 hərbçi İsrailə göndəriləcək
ABŞ rəsmiləri cümə axşamı bildiriblər ki, Birləşmiş Ştatlar təxminən 200 hərbçini İsrailə göndərəcək. Onlar Qəzzada atəşkəs razılaşmasının icrasına nəzarət edəcək və beynəlxalq müşahidə missiyasının tərkibində fəaliyyət göstərəcəklər. Komandaya tərəfdaş ölkələr, qeyri-hökumət təşkilatları və özəl sektor nümayəndələri də daxil olacaq.
ABŞ Mərkəzi Komandanlığının rəhbəri admiral Bred Kuperin bu missiyaya rəhbərlik edəcəyi bildirilir. O, jurnalistlərə açıqlamasında deyib ki, :
“İlkin mərhələdə 200 nəfərlik qrup yerə yerləşdiriləcək. Bizim rolumuz nəzarət və qiymətləndirmədir - razılaşmanın pozulmadığından əmin olacağıq.”
Eyni zamanda, Misir, Qətər, Türkiyə və ehtimal ki, Birləşmiş Ərəb Əmirliklərindən olan hərbi nümayəndələrin də bu komanda ilə əməkdaşlıq edəcəyi qeyd olunub. ABŞ rəsmiləri bildiriblər ki, heç bir Amerika hərbçisi Qəzzaya daxil olmayacaq.
Mənbələrin məlumatına görə, ABŞ Mərkəzi Komandanlığı İsraildə “Mülki-Hərbi Əlaqələndirmə Mərkəzi” yaradacaq. Bu mərkəz humanitar, logistika və təhlükəsizlik yardımlarının koordinasiyasını təmin edəcək.
Humanitar əməliyyatlar davam edir
ABŞ və İsrail tərəfindən dəstəklənən “Qəzza Humanitar Fondu” şimal bölgəsində yeni yardım paylama mərkəzinin yaradılmasına hazırlaşır. Qurumun əməkdaşlarına əməliyyatları azaltmaq barədə heç bir göstəriş verilməyib.
aMənbələr bildiriblər ki, təşkilatın fəaliyyəti dayandırılsa belə, BMT və digər beynəlxalq QHT-lərin yardımı tam bərpa etmək üçün vaxt tələb olunacaq, çünki Qəzzadakı bir çox infrastruktur məhv edilib. Qurumun bəyanatında qeyd olunub ki, yardım əməliyyatları atəşkəs danışıqları fonunda fasiləsiz davam edir.
ABŞ-ın İsraildəki səfiri Mayk Hakabi isə “Haaretz” qəzetinə açıqlamasında bildirib ki, “Qəzza Humanitar Fondu”nun bağlanması Prezident Trampın atəşkəs planının bir hissəsi kimi nəzərdə tutulmur.