BAKI, AzerVoice, Nailə Babazadə
İsrail Baş naziri Benyamin Netanyahunun ofisi cümə axşamı bəyan edib ki, Qəzzada girovların azad edilməsini nəzərdə tutan razılaşma yalnız hökumət tərəfindən təsdiqləndikdən sonra qüvvəyə minəcək.
“Bəzi ərəb mediasında yayılan məlumatların əksinə olaraq, 72 saatlıq gerisayım yalnız Nazirlər Kabinetinin razılaşmanı təsdiqlədiyi iclasdan sonra başlayacaq. Bu iclasın axşam saatlarında keçirilməsi gözlənilir.”-deyə bəyanatda qeyd olunur.
Xatırladaq ki, ABŞ Prezidenti Donald Tramp bu gün səhər saatlarında HƏMAS və İsrailin sülh planının birinci mərhələsini imzaladıqlarını elan edib.
HƏMAS isə açıqlamasında bildirərək vurğulayıb ki, əldə olunan razılaşma Qəzzada müharibənin başa çatdırılmasını, İsrail ordusunun geri çəkilməsini, humanitar yardımların daxil olmasını və məhbus mübadiləsini nəzərdə tutur.