BAKI, AzerVoice
ABŞ Prezidenti Donald Tramp bazar günü bəyan edib ki, “Yaxın Şərqdə böyük nailiyyətlər əldə etmək üçün real imkan var”. O, konkret detallar açıqlamasa da, bir neçə gün öncə Qəzza müharibəsini bitirmək üzrə olduğunu söyləmişdi.
Tramp “Truth Social” platformasında paylaşım edərək yazıb:“Yaxın Şərqdə böyük nailiyyətlər əldə etmək üçün real imkanımız var. Hamı xüsusi bir şey üçün hazırdır, tarixdə ilk dəfə... Biz bunu həyata keçirəcəyik”.
ABŞ administrasiyası rəsmilərinin məlumatına görə, Tramp sabah – bazar ertəsi – İsrailin baş naziri Benyamin Netanyahu ilə Ağ Evdə görüşəcək. Görüşün məqsədi razılaşma üçün əsas çərçivə planı hazırlamaqdır.
Tramp cümə günü də açıqlamışdı ki, Qəzza ilə bağlı Yaxın Şərq ölkələri ilə intensiv danışıqlar aparılır, İsrail və HƏMAS bu müzakirələrdən xəbərdardır və proses lazım olduğu müddətcə davam edəcək.
ABŞ vitse-prezidenti C.D. Vens isə bazar günü “Fox News” kanalına müsahibəsində bildirib ki, Qəzzadakı müharibəni bitirəcək razılaşmaya “indiyədək heç vaxt olmadığı qədər” ümidlidir. Onun sözlərinə görə, plan üç əsas elementi əhatə edir: bütün girovların azad edilməsi, HƏMASın İsrail üçün yaratdığı təhlükənin aradan qaldırılması və Qəzzaya humanitar yardımların artırılması.
“Bu üç hədəfə nail olmağa çox yaxın olduğumuza inanıram”-deyə Vens vurğulayıb.
BMT Baş Assambleyası çərçivəsində ötən həftə dünya liderlərinin Nyu-Yorkda görüşü zamanı ABŞ Yaxın Şərqdə sülh üçün 21 maddəlik planını təqdim edib. Plan Qəzzada iki ilə yaxın davam edən müharibənin sona çatdırılmasını nəzərdə tutur.
Ağ Ev rəsmisinin sözlərinə görə, sənəd bütün girovların – həm sağ, həm də cəsədlərin – geri qaytarılmasını, İsrailin Qətərə qarşı yeni hücumlarının dayandırılmasını və İsrail-Fələstin arasında “dinc yanaşı yaşamaq” üçün yeni dialoqun başlanmasını ehtiva edir.
Qeyd edək ki, İsrail sentyabrın 9-da Dohada HƏMAS hədəflərinə hava zərbəsi endirmiş və bu, Qətərin sərt reaksiyasına səbəb olmuşdu.
HƏMAS nümayəndəsi isə şənbə günü bildirib ki, ABŞ-ın təqdim etdiyi plan hərəkatın diqqətinə rəsmi olaraq çatdırılmayıb.
