BAKI, AzerVoice, Nailə Babazadə

İsrail ordusunun, Suriyanın paytaxtı Dəməşqin cənubunda yerləşən Küsve bölgəsindəki Mani dağına həyata keçirdiyi hava hücumları və hava yolu ilə əsgər endirmə əməliyyatı nəticəsində, Suriya ordusunun əsgərlərinin həlak olduğu bildirilib.

AzerVoice xəbər verir ki,Suriya dövlət televiziyası Əl-İhbariyyənin məlumatına görə, gecə saatlarında Mani dağı ətrafında əraziyə baxış keçirən Suriya ordu birlikləri müşahidə və dinləmə cihazları aşkarlayıb.

Cihazlara müdaxilə edilməyə çalışıldığı anda bölgənin İsrail tərəfindən hava hücumuna məruz qaldığı qeyd olunan xəbərdə, “Hücum nəticəsində bəzi əsgərlər həlak olub, yaralananlar və dağıdılmış texnikalar da var,” – deyə bildirilib.

İsrailin hava hücumlarının bölgəyə çıxışı əngəlləmək məqsədilə davam etdiyi qeyd olunan xəbərdə, “Buna cavab olaraq ordu birlikləri uyğun silahlarla cihazların bir qismini məhv edib və həlak olanların cəsədləri ərazidən çıxarılıb,” – deyə əlavə edilib.

Gecə saatlarında İsrail ordusunun bölgəyə hava hücumu təşkil etdiyi, ardınca təfərrüatları hələlik məlum olmayan hava yolu ilə əsgər endirmə əməliyyatı keçirdiyi və kəşfiyyat təyyarələrinin bölgədə intensiv uçuşlarını davam etdirdiyi bildirilib.