BAKI, AzerVoice, Səməd Əyyubov
Son 24 saat ərzində İsrailin Qəzza zolağına qarşı həayat keçirdiyi hücumlarda həlak olanların sayı 62 min 686 nəfərə çatıb.
AzerVoice xəbər verir ki, bu barədə Fələstin Səhiyyə Nazirliyi açıqlama yayıb.
Bildirilib ki, son sutka ərzində Qəzza zolağındakı xəstəxanalara 64 nəfərin meyiti və 278 yaralı gətirilib. İsrail ordusunun yanvarın 19-da əldə olunan atəşkəsi pozaraq martın 18-dən bəri həyata keçirdiyi hücumlarda 10 min 842 fələstinlinin həlak olduğu, 45 min 910 nəfərin isə yaralandığı qeyd olunub.
Qəzzada son bir gündə humanitar yardım gözləyənlərin hədəf alındığı hücumlarda 19 fələstinli həyatını itirib, 123 nəfər yaralanıb. Bununla da mayın 27-dən bəri İsrail və ABŞ-ın dəstəyi ilə yaradılan “Qəzza Humanitar Yardım Fondu”nun adı altında qurulan yardım paylama məntəqələrində fələstinlilərin hədəf alındığı hücumlarda ölənlərin sayı 2 095-ə, yaralananların isə 15 min 431-ə çatıb.
Nazirliyin məlumatında qeyd olunub ki, 2023-cü il oktyabrın 7-dən bəri İsrailin Qəzza zolağına endirdiyi hücumlarda ümumilikdə 62 min 686 nəfər həlak olub, 157 min 951 nəfər isə yaralanıb. Qəzza zolağında dağıntılar altında hələ də minlərlə meyitin qaldığı vurğulanıb.
Hazırda Qəzza zolağında vəziyyət gərgin olaraq qalır. İsrail ordusunun hücumları davam edir və bölgədə humanitar vəziyyət getdikcə ağırlaşır.
