BAKI, AzerVoice, Səməd Əyyubov

İsrailin Təhlükəsizlik Kabineti ordunun Qəzza zolağında HƏMAS-ın qalan iki əsas mövqeyini – Qəzza şəhərini və zolağın mərkəzindəki qaçqın düşərgələrini məhv etməsinə göstəriş verib.

AzerVoice xəbər verir ki, bu barədə İsrailin baş naziri Benyamin Netanyahu mətbuat konfransında bildirib.

Onun sözlərinə görə, HƏMAS-ın hazırda yalnız iki dayaq nöqtəsi qalıb: Qəzza şəhəri və mərkəzi qaçqın düşərgələri. Netanyahu bildirib ki, avqustun 8-də Təhlükəsizlik Kabineti ordunun bu mövqeləri tamamilə məhv etməsinə qərar verib.

“Yalan bəyanatlara baxmayaraq, bu, müharibəni bitirməyin ən düzgün və ən sürətli yoludur,” – deyə Netanyahu vurğulayıb.

Baş nazir əlavə edib ki, İsrail ordusu bu iki mövqeyi darmadağın edəcək, lakin əvvəlcə mülki əhaliyə döyüş bölgələrini təhlükəsiz şəkildə tərk edərək müəyyən olunmuş təhlükəsiz zonalara keçmək imkanı veriləcək. Onun sözlərinə görə, həmin zonalarda insanlara kifayət qədər humanitar və tibbi yardım göstəriləcək. Netanyahu qeyd edib ki, “bütün müharibə ərzində İsrailin siyasəti humanitar böhranın qarşısını almaq olub, HƏMAS-ın siyasəti isə onu yaratmaqdan ibarət olub.”

Xatırladaq ki, bu həftənin əvvəlində İsrailin hərbi-siyasi kabineti baş nazir Netanyahunun Qəzza şəhərinin bütün ərazisinə nəzarəti ələ keçirmək və əməliyyatları anklavda genişləndirmək planını təsdiqləyib.