BAKI, AzerVoice, Səməd Əyyubov – İsrail Baş naziri Benyamin Netanyahu bildirib ki, bu həftə Təhlükəsizlik Kabinetinin kiçik tərkibli iclasını keçirəcək.

AzerVoice xəbər verir ki, bu barədə Netanyahu Nazirlər Kabinetinin iclasının əvvəlində çıxış edərkən deyib.

Onun sözlərinə görə İclasda ordunun Qəzza zolağında necə irəliləməli olduğu və müharibənin bütün hədəflərinə necə nail olunacağı müzakirə ediləcək.

“Müharibədəki bütün hədəflərimizə çatmaq üçün birlikdə dayanmalı və birlikdə vuruşmalıyıq. Düşməni məğlub etməliyik, girovları azad etməliyik və Qəzzanın bundan sonra İsrail üçün heç bir təhlükə yaratmamasını təmin etməliyik” - deyə, Netanyahu vurğulayıb.

Lakin baş nazir Təhlükəsizlik Kabinetinin kiçik tərkibli iclasının dəqiq vaxtını açıqlamayıb.

Qeyd edək ki, yanvar ayında əldə edilmiş atəşkəsə baxmayaraq, mart ayında İsrail ordusu Qəzzada hərbi əməliyyatları bərpa edib. Qətər, Misir və ABŞ-ın vasitəçiliyi ilə keçirilən bir neçə danışıqlar raundunda tərəflər yeni razılaşma şərtləri üzərində razılaşa bilməyiblər.