BAKI, AzerVoice, Zeynəb Raminqızı
Türk Qızıl Aypara Cəmiyyəti İsrail qüvvələrinin müvəqqəti razılığı ilə Rəfah sərhəd keçid məntəqəsindən Qəzzaya humanitar yardım daşıyan 165 yük maşını ilə daxil olmağa başlayıb.
AzerVoice xəbər verir ki, bu barədə Türk Qızıl Aypara Cəmiyyəti tərəfindən verilən açıqlamada məlumat verilib. Təxminən 3 min ton ərzaq ehtiva edən yardım, bölgədə qıtlıqla mübarizə aparan təxminən 50 min nəfərin bir aylıq ərzaq ehtiyacını qarşılayacaq.
Humanitar yardımın Qəzzaya çatdırılması üçün bütün çətinliklərə baxmayaraq səylərin davam etdiyi bildirilib. Yardım maşınlarının keçidi İsrailin müvəqqəti icazəsi ilə mümkün olub.
Qurum həmçinin Misir və İordaniya Qızıl Aypara Cəmiyyətləri ilə koordinasiyalı şəkildə çalışaraq, yardımın bölgəyə ən sürətli şəkildə çatdırılması üçün əməliyyatları davam etdirir.
Münaqişənin ilk günündən etibarən Qəzzada şorbaxanalar vasitəsilə gündəlik isti yemək paylayan Türk Qızıl Aypara, İordaniya üzərindən də yardımın axınını təmin etmək üçün əməkdaşlıq edir.
Bu yardım əməliyyatı bölgədə humanitar böhranı yüngülləşdirmək məqsədilə həyata keçirilir və vəziyyətin ağır olduğu Qəzzada əhalinin ehtiyaclarının qarşılanmasına dəstək olacaq.
