BAKI, AzerVoice, Nailə Babazadə
Gürcüstanın Kaxeti bölgəsində qəzaya uğrayan Türkiyə Hərbi Hava Qüvvələrinə (THK) məxsus C-130 tipli hərbi yük təyyarəsinin “qara qutusu” Türkiyəyə gətirilib.
AzerVoice xəbər verir ki, Kaxeti bölgəsinin Siqnaxi bələdiyyəsinə aid dağlıq ərazidə yerə çırpılan C-130 tipli hərbi təyyarə ilə bağlı qəza araşdırma və axtarış-xilasetmə işləri helikopterlərin dəstəyi ilə davam etdirilib.
Gürcüstan Daxili İşlər Nazirliyinə tabe olan qruplar və Gürcüstan ordusunun bölmələri də əməliyyatlara fəal şəkildə cəlb olunub. Axtarış-xilasetmə işləri Gürcüstanın daxili işlər naziri Geka Geladze və müdafiə naziri İrakli Çikovani tərəfindən yerində izlənib.
Türkiyədən gələn axtarış-xilasetmə qrupu və mütəxəssislər də əməliyyatlarda iştirak edib. Mətbuat nümayəndələrinə hadisə yerindən təxminən bir kilometr məsafədə duraraq prosesi izləməyə icazə verilib.
Təyyarənin gövdə və mühərrik hissələri, eləcə də ətrafda aşkar edilən bütün dəlillər araşdırılacaq. Hadisə yerində qəzanın səbəbini aydınlaşdırmağa kömək edə biləcək hər bir detal qeyd altına alınır.
Qəzanın dəqiq səbəbi, sahə işlərinin tamamlanmasından və texniki təhlillərin başa çatmasından sonra müəyyən ediləcək.