BAKI,AzerVoice, Orxan Qədirzadə
Sumqayıt Dövlət Universitetində (SDU) İqtisadi Araşdırmalar və Tədris Mərkəzinin təşəbbüsü ilə I Beynəlxalq Maliyyə, Mühasibat, Audit və Rəqəmsallaşma Simpoziumu təşkil edilib. Tədbir SDU, Bursa Uludağ Universiteti, Xəzər Universiteti, Auditorlar Palatası, KOBİA, Azərbaycan Sahibkarlar Konfederasiyası (ASK), MÜSİAD Azərbaycan və Türkiyənin İctimai Nəzarət, Mühasibat və Audit Standartları Qurumu (KGK) tərəfindən birgə təşkil olunub. Simpoziumun Baş sponsoru SİNAM şirkəti olub.
AzerVoice xəbər verir ki, simpoziumda Türkiyə və digər türkdilli ölkələrdən 30-dan çox nüfuzlu universitetin nümayəndələri, həmçinin iqtisadiyyat, maliyyə və rəqəmsallaşma sahəsində çalışan mütəxəssislər iştirak edib. Tədbir ümummilli lider Heydər Əliyevin və Azərbaycanın müstəqilliyi, ərazi bütövlüyü uğrunda şəhid olmuş qəhrəmanların xatirəsinin anılması ilə başlayıb, Dövlət Himni səsləndirilib və Qarabağ mövzusunda videoçarx nümayiş olunub.
Açılış mərasimində Milli Məclisin deputatı Tahir Mirkişili, Türkiyənin Azərbaycandakı səfirliyinin ticarət üzrə baş müşaviri Murat Yaman, SDU-nun rektoru professor Əminağa Sadıqov, Bursa Uludağ Universitetinin prorektoru professor Zekeriya Arı, KOBİA sədrinin müavini Rüfət Atakişiyev, ASK-nın vitse-prezidenti Vüqar Zeynalov, KGK-nın II sədri Hayrettin Kurt, Auditorlar Palatasının icraçı direktoru Səbuhi Gülməmmədov, MÜSİAD Azərbaycan sədrı Rəşad Cabirli, SİNAM şirkətinin direktoru Əbülfət Rəhmanov, Elm və Təhsil Nazirliyinin baş məsləhətçisi Osman Hacıyev və İqtisadi Araşdırmalar və Tədris Mərkəzinin rəhbəri Radil Fətullayev çıxış ediblər.
Natiqlər simpoziumun mühasibat, maliyyə, audit və rəqəmsallaşma sahəsində müasir çağırışların müzakirəsi, elmi biliklərin inteqrasiyası və əməkdaşlıq imkanlarının genişləndirilməsi baxımından əhəmiyyətini vurğulayıblar.
Simpozium bölmələr üzrə işini davam etdirib. Müzakirə olunan mövzulara “Türk dünyasında mühasibat uçotu və audit sahəsində yeni trendlər”, “Peşəkar mühasiblərin və auditorların yetişdirilməsi üzrə dünya təcrübəsi”, “Beynəlxalq və milli standartların tətbiqi”, “Rəqəmsallaşma və süni intellektin tətbiqi”, “MHBS və audit standartlarında dəyişikliklər” və “Vergi qanunvericiliyində 2025-ci il dəyişiklikləri və 2026-cı il yenilikləri” daxildir.
Məruzəçilərə sertifikatlar təqdim olunub. Beynəlxalq simpoziumun ikinci mərhələsi bu gün Xəzər Universitetində keçirilir.
