BAKI, AzerVoice, Nailə Babazadə

İndoneziya müdafiə naziri bildirib ki, ölkə Qəzzada planlaşdırılan sülhməramlı əməliyyat üçün səhiyyə və tikinti tapşırıqları üzrə maksimum 20 min əsgər hazırlayıb.

AzerVoice xəbər verir ki, hazırlıqlar ABŞ-ın təşəbbüsü ilə çoxmillətli sabitləşdirmə qüvvəsi yaradılması planları çərçivəsində həyata keçirilir. Qoşunların nə zaman yerləşdiriləcəyi və hansı mandatla fəaliyyət göstərəcəyi hələ qərara bağlanmayıb.

Nazir əlavə edib ki, prezident Prabovo Subianto və Yordan kralı II Abdullah ABŞ-ın təşəbbüsünü müzakirə edəcək. İndoneziya BMT Təhlükəsizlik Şurasının mandatı olarsa, Qəzzada sülhün təmin olunması üçün 20 min və daha çox qoşun göndərməyə hazırdır.

Uzun illər iki dövlətli həllin tərəfdarı olan İndoneziya tez-tez İsrailin Qəzzadakı zorakılığını pisləyib, humanitar yardım göstərir və İsraillə diplomatik əlaqəyə malik deyil. Lakin analitiklər bildirirlər ki, Prabovonun xarici siyasət mövqeyi müəyyən qədər yumşalaraq, həm Fələstin dövləti, həm də İsrailin təhlükəsizliyinin təmin olunması çağırışını bir araya gətirib.