BAKI, AzerVoice, Zeynəb Raminqızı
İsrailin təhlükəsizlik kabineti bu həftə Qəzzaya mərhələli şəkildə hücumların genişləndirilməsi və atəşkəs danışıqlarının gələcəyi ilə bağlı qərar verəcək.
AzerVoice xəbər verir ki, bu barədə İsrailin “Kanal 12” və “Kanal 13” telekanalları məlumat verir.
Ölkənin təhlükəsizlik kabineti Qəzza zolağına qarşı yeni mərhələli hücum planını gündəmə gətirib.
Planın məqsədi, humanitar böhranın dərinləşdiyi bölgədə, xüsusilə qaçqın düşərgələri kimi “həssas ərazilər”ə quru hücumlarının təşkili ilə İsrail girovlarının azad edilməsini təmin etməkdir.Lakin bu istiqamətdə kabinet daxilində ciddi fikir ayrılıqları yaşanır.
Strateji işlər naziri Ron Dermer, maliyyə naziri Bezalel Smotrich, milli təhlükəsizlik naziri Itamar Ben-Qvir və Baş nazir Netanyahunun hərbi müşaviri Roman Qofman daxil olmaqla bir sıra yüksək rütbəli şəxslər hücumların genişləndirilməsinin tərəfdarıdır. Onlar, hətta məhbusların həyatı bahasına belə, hərbi əməliyyatların intensivləşdirilməsini müdafiə edirlər.
Əks cəbhədə isə atəşkəs və məhbus mübadiləsi razılaşmasını müdafiə edənlər var. Baş Qərargah rəisi Eyal Zamir, xarici işlər naziri Gideon Saar, Mossad direktoru David Barnea və digər yüksək rütbəli rəsmilər girovların həyatı üçün təhlükə yarada biləcək hücumlara qarşı çıxır.
“Kanal 13”ün məlumatına görə, Eyal Zamir yaxın ətrafına bildirib ki, siyasi rəhbərlikdən açıq göstəriş olmadan hücum əmri verməyəcək. Onun bu yanaşması, girovların taleyinin ön plana çəkildiyini göstərir.
“Haaretz” qəzetinin məlumatına əsasən, İsrail ordusu “mərhələli hücum planı”nı bu həftə ərzində Nazirlər Kabinetinə təqdim etməyə hazırlaşır. Yeni plan çərçivəsində, əvvəllər hərbi müdaxilədən yayınan bölgələr – xüsusilə dəfələrlə köçkün vəziyyətinə düşmüş fələstinlilərin sığındığı yerlər – hədəf alınacaq.
Qeyd edək ki, İsrailin 7 oktyabr 2023-cü ildən bəri davam edən hücumları nəticəsində Qəzzada dağıntılar və insan itkiləri hər gün artır. İsrailin intensiv bombardmanları blokadanı daha da gücləndirdi və mülki əhalinin qida, su və dərman kimi əsas ehtiyacları əldə etməsini demək olar ki, qeyri-mümkün edib.
Birləşmiş Millətlər Təşkilatının və beynəlxalq hüquqi qurumların xəbərdarlıqlarına baxmayaraq, İsrailin amansız hücumları Qəzzada əksəriyyəti uşaq və qadın olmaqla ən azı 60 839 fələstinlinin ölümü, 149 588 nəfərin yaralanması ilə nəticələnib.