BAKI, AzerVoice , Fərid Mikayılov

İran Xarici İşlər Nazirliyinin sözçüsü İsmayıl Bəqai, Əl-Əqsa məscidinə təşkil edilən basqının beynəlxalq və regional sülh üçün ciddi təhdid yaratdığını bildirib.

AzerVoice xəbər verir ki, Bəqai bildirib ki, bu hücum, məscidin müqəddəsliyinə və dini statusuna qarşı hörmətsizlik olmaqla yanaşı, BMT qətnamələrinin də pozulmasıdır.

Onun sözlərinə görə, bu kimi addımlar İsrailin işğal olunmuş Fələstində və regionda gərginliyi davam etdirmək və böhranlar yaratmaq niyyətini bir daha nümayiş etdirir.

“Müsəlmanların ilk qibləsi olan Əl-Əqsa Məscidi bütün İslam aləmi və fələstinlilər üçün xüsusi hörmətə malikdir. Bu müqəddəs məkana qarşı hörmətsizlik, Qüdsün İslam və tarixi kimliyini dəyişmək, dünya müsəlmanlarının hisslərini təhrik etmək və işğal olunmuş Fələstində gərginliyi artırmaq məqsədi daşıyır” – deyə Bəqai vurğulayıb.

Nazirlik rəsmisi həmçinin qeyd edib ki, bütöv və vahid Qüds, Fələstinin əbədi paytaxtıdır və beynəlxalq ictimaiyyət İsraili Fələstin torpaqları və xalqına qarşı həyata keçirdiyi cinayətkar siyasəti dayandırmağa məcbur etməlidir.