BAKI, AzerVoice, Səməd Əyyubov – Misirin 107 ton dizel yanacağı daşıyan iki yanacaq tankeri Qəzza zolağına daxil olmaq üçün hazır vəziyyətdədir.

AzerVoice xəbər verir ki, bu barədə Misirin dövlətə bağlı "Al Qahera News" televiziya kanalı məlumat verib.

Bu addım İsrailin aylarla bölgəyə humanitar yardımın girişini məhdudlaşdırmasından sonra atılıb.

Qəzza zolağının Səhiyyə Nazirliyi isə bildirib ki, yanacaq çatışmazlığı xəstəxanaların fəaliyyətini ciddi şəkildə çətinləşdirir və tibbi xidmətlərin göstərilməsinə mane olur.

Hazırda yanacaq tankerlərinin Qəzzaya daxil olub-olmadığına dair rəsmi məlumat verilməyib.

Həmçinin qeyd edək ki, bu il martın 2-dən etibarən Qəzza zolağına beynəlxalq humanitar yardım çatdırılmır. İsrail hakimiyyətinin qərarına əsasən, bütün nəzarət-buraxılış məntəqələri bağlanıb. Ərzaq paylanması isə İsrail və ABŞ-ın nəzarətində olan “Qəzza Humanitar Yardım Fondu” vasitəsilə həyata keçirilir.

Yanvar ayında əldə edilmiş atəşkəsə baxmayaraq, mart ayında İsrail ordusu Qəzzada hərbi əməliyyatları bərpa edib. Qətər, Misir və ABŞ-ın vasitəçiliyi ilə keçirilən bir neçə danışıqlar raundunda tərəflər yeni razılaşma şərtləri üzərində razılaşa bilməyiblər.