BAKI.AzerVoice

ABŞ-ın keçmiş prezidenti Barak Obama İsrailin Qəzzada hərbi əməliyyatlarını dayandırmağa və Qəzza xalqına humanitar yardım çatdırmağa çağırıb.

AzerVoice xəbər verir ki, Obama X sosial media hesabında “New York Times” (NYT) qəzetində Qəzza xalqının çəkdiyi aclığı üzə çıxaran iki xəbər paylaşıb.

Obama Qəzza böhranına qalıcı bir həllə nail olmaq üçün İsrailin hərbi əməliyyatlarının dayandırılmasının vacib olduğunu vurğulayıb.

Paylaşımında günahsız insanların qarşısı alına bilən aclıqdan həyatını itirməsinin qarşısını almaq üçün təcili hərəkətə keçmənin vacibliyini qeyd edib.

"Yardımın Qəzza xalqına çatmasına icazə verilməlidir. Mülki ailələrin qida və su əldə etməsinə maneə olmaq üçün heç bir əsas yoxdur", - deyə Obama vurğulayıb.

İsrailin hücumu və humanitar yardımların daxil olmasını məhdudlaşdıran sıx mühasirə altında olan Qəzza zolağı geniş aclıq və su, dərman, tibbi ləvazimat və gigiyena materiallarının çatışmazlığı ilə humanitar fəlakət yaşayır.

Qeyd edək ki, Qəzza zolağında aclıqdan, xüsusən də uşaqlar arasında ölüm halları artır. Qəzza zolağında aclıqdan ölən fələstinlilərin sayı 133-ə çatıb.

İsrailin tətbiq etdiyi embarqo səbəbindən Qəzzada başlayan aclıq fəlakətindən sonra Birləşmiş Ərəb Əmirlikləri (BƏƏ) və İordaniya bölgəyə havadan yardım göndərməyə başlayıb.