BAKI, AzerVoice

İsrailin Qəzzaya təşkil etdiyi hücumlarda 48 fələstinli həlak olub.

AzerVoice xəbər verir ki, İsrail ordusunun bu gün səhər saatlarından etibarən Qəzza zolağının müxtəlif bölgələrində həyata keçirdiyi hava və quru hücumları nəticəsində azı 48 fələstinli həlak olub, onlarla insan isə yaralanıb.

Hücumlarda uşaqlar və humanitar yardım gözləyən mülki şəxslər də hədəf alınıb.

Şahidlər və səhiyyə mənbələrinin bildirdiyinə görə, Şati Qaçqınlar Düşərgəsində bir ailəyə məxsus ev bombalanıb, ətrafdakı çadır və binalarda da ciddi dağıntılar olub. Hücum nəticəsində 5-i uşaq olmaqla 10 nəfər ölüb, 30-dan çox insan yaralanıb.

İsrailin Qəzzanın şimalı, Deyr Bəlax, Bureyc və Nusayrat kimi bölgələrə yönəltdiyi hücumlarda mülki yaşayış evləri və qaçqın düşərgələri də hədəf alınıb. Xan Yunisdə və Rəfahın qərbində isə çadırlara və yardım növbəsində gözləyən insanlara atəş açılıb. Nəticədə müxtəlif bölgələrdə azı 48 fələstinli həyatını itirib, 100-ə yaxın insan yaralanıb.

Qeyd edək ki, son günlərdə Qəzza zolağında artan hərbi əməliyyatlar nəticəsində çoxsaylı mülki şəxslərin, o cümlədən qadın və uşaqların həyatını itirməsi beynəlxalq ictimaiyyətdə ciddi narahatlıq doğurur. BMT və insan haqları təşkilatları təxirəsalınmaz atəşkəs çağırışlarını bir daha gündəmə gətiriblər.