BAKI, AzerVoice
Tehranın müvəqqəti cümə imamı Ayətullah Əhməd Hatəmi və digər din xadimləri ABŞ Prezidenti Trampın İrana və ölkənin Ali Dini lideri Ayətullah Seyid Əli Xameneiyə yönəltdiyi təhdidlərə sərt reaksiya verərək, ona və İsrailin Baş naziri Benyamin Netanyahuya fətva elan ediblər.
AzerVoice-un məlumatına görə, Hatəmi Trampın təhdidlərini “ABŞ Prezidentinin ən böyük axmaqlığı” kimi qiymətləndirib və İran xalqının heç vaxt təslim olmayacağını bildirib.
Netanyahu və Trampın yer üzündə fitnə-fəsad törətmək, kütləvi qətllər törətmək kimi əməllər işlədiyini deyən Hatəmi, dini hökmlərə görə onların cəzasının edam olduğunu söyləyib.
Digər tərəfdən, İranda tanınmış din xadimləri, verdikləri fətvalarda Tramp və Netanyahunun qanının axıdılmasının zəruri olduğunu bəyan ediblər.
Ayətullah Məkarim Şirazi və Ayətullah Nuri Həmədani də İran liderinə qarşı yönələn təhdidlərin “dinə qarşı açıq müharibə” olduğunu vurğulayaraq, Tramp və Netanyahunun öldürülməsinin vacibliyini vurğulayıblar.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.