BAKI, AzerVoice
İsrailin Qəzzaya hücumları nəticəsində bölgədəki telekommunikasiya şəbəkəsinin 74 faizinin məhv edildiyi bildirilib.
AzerVoice xəbər verir ki, Fələstin Telekommunikasiya Nazirliyindən verilən yazılı açıqlamada, nazir müavini Huda əl-Vahidinin Birləşmiş Millətlər Təşkilatının (BMT) Beynəlxalq Telekommunikasiya İttifaqının (BTİ) Cenevrədə keçirilən İcraiyyə Şurasının iclasında çıxış etdiyi qeyd edilib.
Vahidi, İsrailin Qəzzaya etdiyi hücumlarda 580 mobil qüllə və fiber şəbəkənin məhv edildiyini, beləliklə də telekommunikasiya şəbəkəsinin 74 faizinin məhv edildiyini bildirib.
Vahidi, cari zərərin 164 milyon dollar, qarşıdakı 5 il üçün gözlənilən zərərin isə 736 milyon dollar olduğunu, Qəzzada rəqəmsal infrastrukturun pisləşdiyini bildirib.
Vahidi BMT-nin 2024-cü ildə qəbul etdiyi və Fələstinin telekommunikasiya sektorunun yenidən qurulmasını nəzərdə tutan qətnaməsinin icrasına çağırıb.
Qeyd edək ki, 2023-cü il oktyabrın 7-dən bəri Qəzzada İsrailin həyata keçirdiyi hücumlar nəticəsində ölənlərin ümumi sayı 56 500-ə, yaralananların sayı isə 133 419-a çatıb.
İsrailin martın 18-də atəşkəsi pozaraq Qəzzəyə yenidən başladığı hücumlar çərçivəsində isə bu günə qədər 6 175 nəfərin öldüyü, 21 378 nəfərin yaralandığı qeyd olunub.
Humanitar təşkilatlar, aclıq riski altındakı körpələrin həyatda qalması üçün təcili yardıma ehtiyac olduğunu vurğulayıb.