BAKI, AzerVoice

İran və İsrail arasında qarşıdurmanın başa çatmasından sonra növbəti addım kimi, Yaxın Şərqdə təhlükəsizlik və sabitliyə nail olmaq məqsədilə Qəzza zolağında atəşkəsin təmin edilməsi vacibdir.

AzerVoice xəbər verir ki, bu barədə qərargahı İordan çayının qərb sahilində yerləşən Ramallah şəhərində olan Fələstin rəhbərliyi bəyanat yayıb.

Bəyanatda Fələstin rəhbərliyi İran və İsrail arasında hərbi əməliyyatların dayandırılması barədə razılaşmanın əldə olunmasını alqışlayaraq bunun regionda gərginliyin azalmasına xidmət etdiyini bildirib.

“Atəşkəs regionda təhlükəsizliyin diplomatik yollarla təmin olunması istiqamətində mühüm addımdır” – deyə, bəyanatda qeyd olunub.

“Növbəti addım Qəzza zolağında atəşkəsin təmin edilməsi olmalıdır. Bu, fələstin xalqının əzablarını yüngülləşdirəcək, fələstin məsələsinin beynəlxalq hüquqa uyğun şəkildə həllinə imkan yaradacaq və Yaxın Şərqdə davamlı sülhün bərqərar olmasına şərait yaradacaq” - deyə, bəyanatda əlavə olunub.

Xatırladaq ki, martın 18-də İsrail ordusu yanvar ayında əldə edilmiş atəşkəs rejimini pozaraq Qəzza zolağında hərbi əməliyyatları bərpa edib. Qətər, Misir və ABŞ-ın vasitəçiliyi ilə keçirilən bir neçə danışıqlar raunduna baxmayaraq, tərəflər yeni atəşkəs şərtləri üzrə razılığa gələ bilməyib.