BAKI, AzerVoice
ABŞ administrasiyası İsraillə HƏMAS arasında əsir mübadiləsi və Qəzza zolağında 60 günlük atəşkəsin təmin olunmasını nəzərdə tutan yeni bir plan təqdim edib.
AzerVoice xəbər verir ki, bu barədə İsrailin "Israel Hayom" qəzeti məlumat yayıb.
Məlumata görə, təklifdə İsrailin saxladığı fələstinli məhbusların azad edilməsi müqabilində HƏMAS-ın əlindəki israilli girovların azadlığa buraxılması nəzərdə tutulur.
Təklifə əsasən, atəşkəs 60 gün davam edəcək və bu müddət ərzində tərəflər arasında müzakirələr aparılaraq hücumların tamamilə dayandırılması və Qəzzanın bərpasına dair razılığın əldə edilməsi hədəflənir.
Eyni zamanda, ABŞ-ın təqdim etdiyi formulun atəşkəsə və yenidənqurma prosesinə qatılan bütün tərəflərə ciddi təminatlar verdiyi qeyd olunur.
Nəşr yazır ki, HƏMAS artıq ABŞ-ın bu təklifini qəbul edib. Lakin nə HƏMAS, nə də İsrail və ABŞ tərəfindən bu məsələ ilə bağlı rəsmi açıqlama verilməyib.
Xatırladaq ki, İsrail Baş naziri Benyamin Netanyahu iyunun 10-da verdiyi açıqlamada, Qəzzada atəşkəs və əsir mübadiləsi ilə bağlı danışıqlarda əhəmiyyətli irəliləyiş əldə edildiyini bildirmişdi.
