Foto: AA
BAKI, AzerVoice
İsrail ordusu, Qəzza şəhərinin bəzi hissələrinin sakinlərinə hücumdan əvvəl təxliyə əmri verib.
AzerVoice xəbər verir ki, bu haqda ordunun sözçüsü Avixay Edri X sosial şəbəkəsində yazıb.
Onun paylaşımında Qəzza zolağının nömrələnmiş kiçik bloklara bölündüyü və "qadağan bölgələrin" qırmızı ilə işarələndiyi bir xəritə göstərilib.
"Bu, hücumdan əvvəlki son və təcili xəbərdarlıqdır" - deyə, ordu nümayəndəsi bildirib. Onun sözlərinə görə, ordu "raketlərin atıldığı bütün əraziləri hədəf alacaq."
Qeyd edək ki, İsrail ordusu son zamanlar Qəzzada hərbi əməliyyatlarını gücləndirib və bunun HƏMAS-ı məğlub etmək üçün yenidən başladığı bir təşəbbüs olduğunu bildirib.
Beynəlxalq ictimaiyyətdə atəşkəsin müzakirəsi ilə bağlı çağırışlar son həftələrdə artıb.
HƏMAS-ın nümayəndəsi Xəlil Əl-Həyyə bildirib ki, HƏMAS Qəzzada daimi atəşkəsin əldə olunmasına yönəlmiş yeni danışıqlara başlamağa hazırdır.
Yeni atəşkəsin əldə olunması məqsədilə aparılan danışıqlar, mart ayında son müvəqqəti atəşkəsin pozulmasından sonra hər hansı bir irəliləyiş əldə etməyib.
