Bakı. AzerVoice:

Qəzza zolağının cənubundakı Rəfah şəhərində 1 milyondan çox insan ağlasığmaz iztirablarla üzləşib. Qəzzada getməyə yer qalmayıb.

AzerVoice-un məlumatına görə, bu sözləri BMT-nin fövqəladə hallar üzrə koordinatoru Martin Qriffits, İsrail ordusunun Rəfah bölgəsində mümkün əməliyyatını şərh edərkən deyib.

"Rəfahda sığınan fələstinlilərin evləri dağıdılıb, küçələr minalarla dolub, məhəllələr bombalanıb. Aylardır mülki əhali bombardmanlar, qida çatışmazlığı və xəstəlik fonunda köçmək məcburiyyətində qalıb. “Hara gedə bilərlər? Onlar necə təhlükəsiz qala bilərlər? Qəzzada gedəcək başqa yer yoxdur”,- deyə o bildirib.

BMT sözçüsü, ictimaiyyəti Qəzzanın mülki əhalisinin qorunmasına, sığınacaq, qida və tibbi xidmətlərlə təmin olunmasına çağırıb.

Bundan əvvəl İsrail baş nazirinin dəftərxanası bildirib ki, Qəzzanın cənubunda HƏMAS-ın dörd batalyonunu məhv etmədən müharibənin məqsədinə nail olmaq mümkün deyil.

Qeyd edək ki, oktyabrın 7-də İsrail-Fələstin münaqişəsinin yeni mərhələsi başlayandan bəri Qəzza zolağında ölənlərin sayı 27 min 947 nəfərə çatıb.

Aytac Süleymanova

Twitter: a_alieva_